陸羽仁 - 同銀行唔同命

昨日個市一個字：悶。恒指無大上落，收20876點，跌29點，成交603億，又唔算少喎，看來個市係悶，但唔算好靜。

香港股民愛滙控(005)，去到有少少唔係好理性的地步，總俾佢好多機會，大家見證券行對滙控雖然失望，但唔係好多間行調低佢評級，又撲班散戶出來買，滙控大班真係要爭吓氣。佢昨日反彈1.1%，收81.42元，成交29億元。

同滙控暗暗爭先的渣打(2888)下午公佈業績，去年全年純利33.8億美元，按年升4.7%，每股盈利1.679元，建議派發末期息每股44.8仙，業績符合市場預期，午後見到業績渣打股價升幅收番窄少少，結果升1.7%，收報183元，昨日最高造過186 元，估計係偷步炒業績的盤。

市場估渣打去年盈利介乎31億美元至37億美元之間，估佢由按年倒退5%至增長13%都有，渣打實際業在中間位，都算理想。

渣打市盈率大低水

渣打去年期內香港區稅前溢利10.62億美元，較08年上升7.4%，印度業務去年稅前溢利10.6億元，升19%；中東及其他東南亞地區稅前溢利3.7億元，較對上年同期6.5億元倒退44%。渣打為中東地區減值急升至8億美元，大升350%，整體貸款減值20億美元，升51%。渣打已為中東業務作出較大減值，還有33.8億純利，都算唔錯。

你可能會問，滙控去年純利升2%，渣打都係升4.7%，都唔係好得過滙控好多，點解又睇好渣打？因為渣打08年純利升17%創咗新高，09年係在高底數上再創新高。滙控前年純利大跌70.8%(07年滙控純利創高位190億美元)，09年係在一個咁低的基數上微升，彈唔起，都唔好講話創新高了。睇市盈率就知啦，滙控按09年純利的市盈率25倍，渣打按09年純利計市盈率只是11.5倍，按市盈率渣打平一半以上。所以大家買滙控，只係憧憬佢好快會升番上過100億美元的純利「正常水平」，但幾時做到就無人知啦。渣打市盈率咁低，只係人地怕佢盈利會回落，如何佢始終唔落仲再上升，咁又唔應該只值11.5倍PE噃。渣打公佈業績後，證券界睇好，例如摩根大通就將渣打目標價由190元提高到210元，同滙控比真係同行唔同命。

我去年在網誌叫大家留意隻中航科工(2357)，話佢要轉型變身，如今一步步發生緊。中航科工前日收市後向市場批出3.35 億股新股，配售價3.4元，比前日收市價折讓9%多啲，抽水最多11億元左右。一般市場不歡迎公司批股攤薄現有權益，但中航科工昨日股價表現硬淨，收 3.77元，跌0.5%，下午佢一度倒升上3.91元，結果略回，真係巴閉，收市價仍比批股價3.4元高10.9%。

中航科工陸續有來

雖然航科批股要幾日後先收到貨，唔係收舊股可以馬上沽，但係一聽到折讓批股一定有好多人沽，問題點解又有咁多人買，令股價跌唔落去。聞說批股包銷商是中銀，有好多芬佬想要貨，結果超咗額3倍幾，不排除攞唔夠貨的芬佬在市面買貨。

航科母公司話到明要將過千億航空工業資產注入航科之內，要向一家市值175 億的公司，注入過1000億資產，唯一方法是將佢愈做愈大，大家唔好誤會佢會升10 倍，但正常去搞都要股價向上，批吓股，又注吓資，又再向上，又再注資，咁樣先可以做大，如今批股後都有人掃貨，不排除有人留意到注資行好快又到。中銀在1 月時出過個報告，話目標價4.3元，呢隻嘢無乜行有睇，無人出報告，除咗中銀，相信佢都係比較明白公司的意圖，今次中銀幫公司批完股股價無大插，都算做番齣好戲。