陸羽仁 - 外圍冷 香港暖

隔夜美股大漲2%，滙控(005)承接歐美升勢，高開逾2%，推動恒指裂口高開197 點，其後略為回順。上證綜指臨收市急插，以全日最低位收市，跌幅更係三周以來最大。恒指午後進一步回落，收市升幅收窄至44點，報21457點，大市成交683億元。

早幾日喺網上講杜氏理論，話美股的走勢呈強勢，杜指和杜瓊斯運輸指數同時向好，係傳統向好趨勢。港股升200點後出現阻力，但形勢上突破10600點的上行阻力位，形成一個破位向上之勢，短期可能有小反覆，但向上之勢已成，?家短線看淡的風險更大。

滙控公佈中期業績，稅前盈利增長逾倍。多家大行調高對滙控的評級及目標價。睇得最好嘅係摩根大通及美銀美林，分別予評級「增持」，和「買入」，目標價115元及108元。

通縮威脅資金避險

睇得無咁樂觀嘅係高盛。該行表示，滙控撇除本身債務匯兌損益，因息差壓力、美融貸款顯著流出及歐洲貸款收縮，核心收入仍受壓。而投資者目前對滙控有兩個觀點：一是以歐洲為基礎投資者可能看好亞洲市場強勁前景，以及相對大部份歐洲銀行資本和資金狀況較強。第二類則以亞洲為基礎投資者(包括高盛本身)，可能發現滙控盈利增長令人鼓舞，但相對區內其他銀行，收入及盈利增長預期可能明顯較弱。高盛維持滙控評級「中性」，目標價80元不變。

滙控昨日在倫敦及紐約市場都大顯光芒，兩地都勁升逾半成，但返到香港，升勢就明顯放緩。高開2%後就無力再上。喺82.95元就見頂回落，收市升1.8%至82.5 元。

港股最近炒上，主要係全球生產物價指數都出現放緩，市場估計利率短期難於調升，債王格羅斯仲警告，美國有通縮風險，故此增加買入政府債券避險。美國情況和香港不同，美國失業率維持高企，政府提供的臨時職位又慢慢減少，市場擔心消費信心減弱，美國可能會陷入日式衰退，香港則仍然有通脹情況，失業率持續處於合理水平，加上租金上升，令經濟保持熱度，結果形成外圍冷、香港暖的情形，在息口偏低底下，對資產價格有利，樓市最新就出現豪宅同細價樓齊齊升溫的情況，近期連新界樓都有人炒，反映市況開始過熱。

地產股乘勢而炒

恒指分類指數以地產股表現最好，升1.1%，頂住大市跌勢，顯示資金乘勢而炒。本地及內地地產股普遍向上。長實(001)星期四公佈業績，券商料長實中期核心純利約70億元，股份受追捧，升0.9%。

內房股方面，有媒體報道，國土資源部已將一份涉及全國1457宗閒置土地的統計表交予銀監會，銀監會將根據這份「黑名單」做一次全面的風險排查，80%的閒置土地可能被收回，其中北京、廣州、海南、江蘇等地成為閒置土地「重災區」。

北京閒置土地最多，共160宗，總面積703萬平方米，涉及合同金額8.5億元，這些閒置土地的持有者包括泛海建設及華潤置地(1109)等。不過報道無阻內房股的反彈強勢，世房(813)及富力(2777)更齊漲逾2.2%。

hightea@hkheadline.com 企業CEO陸羽仁‧逢周一至五見報