陸羽仁 - 滙控無令股民失望

港股8月份第一個交易日高開高走，氣勢如虹，恒指再創3個多月新高，收報21 413點，大漲383點，大市成交亦算唔錯，成交629億元。睇港股走勢，如果周邊市場頂得下的話，恒指今季有望衝擊上22300點，21500點將係短線第一個阻力位。大市成交初現突破，假如後市向好，相信升幅先會集中價優質股份之上，故此手頭有大價藍籌股，走勢又對辦，即係唔係人升佢唔升，成日落後大市的話，不妨就繼續持有，希望可以有靚價食胡。

內房續炒放鬆政策

現時市場產生「新政可能不繼續執行」的遐想，很多已經開始看房的潛在購房者繼續觀望。不過，《中國證券報》引述住建部政策研究中心副主任王玨林表示，未來內地調控政策不達到效果絕不會放鬆，由於過去政策落實比較緩慢，部份城市執行力度不夠，因此下半年樓市調控應當加大調控政策執行力度，其次加大房屋供應量，緩解需求。內房股昨日表現不俗，其中華潤置地(1109)、恆大地產(3333)、碧桂園(2007)及富力(2777)都漲逾4%。

滙控(005)和恒生(011)昨日收市後公佈業績。大笨象中期純利67.63億美元，按年增長102%。撇除本身債務公允值則為100億美元，實際稅前利潤上升22億美元或30%，至96億美元。滙控最叫人憂心嘅係北美及歐洲國業務，期內北美洲業務轉虧為盈，管理層仲話美國業務的發展樂觀。

囝囝恒生截至今年6月底，錄得純利70億元，按年上升8.4%，每股盈利3.64元，派中期股息1.1元。恒生表現中規中矩，滙控就異常強勁，符合市場預期。隨後將有多家公司公佈業績，估計可繼續支持大市向上，明日恒指有機會挑戰21500點。

留意派息反映前景

市場焦點集中在滙控，中環茶友中有唱淡滙控派，佢話滙控業務佈局好聽係國際化，實際係三不「像」。不過，業績公佈前，茶友就心郁郁想入市，買番幾手滙控玩吓。

點解茶友想買滙控呢？佢個答案好「怪雞」，就係要向高難度挑戰喎。佢話，過去有兩隻股玩殘好多散戶，一隻係八號仔電盈；一隻係大笨象滙控，有些號稱「股神」級股評人，死買滙控多年，已經輸到阿媽都唔認得，但佢咁多年都一直無買過，成功避過呢兩個藍籌陷阱；不過，過去一年，佢發覺好少人推介呢兩隻股份，計吓數八號仔係2.2元水平，市盈率同派息都幾吸引，大笨象價錢亦唔算貴，於是生起撈底之心，若然成功執平貨賺錢，咁就有排牙擦嘞！

最後，茶友話佢都係無買到，理由係炒股目標係贏錢唔係贏牙骹，諗落都係無謂捨易取難，萬一失手豈不是打爛「齋砵」？所以最後都係無郁手。茶友講完，在座者噓聲四起，柴台者話咁即係升跌你都講晒喇！茶友話，大家柴台無所謂，但佢呢番話的意思，係話自己改變咗以往唱淡滙控的立場，雖然唔係睇好，但已經改為「中性」，理由係經過一輪大執後，滙控盤數應該慢慢整番似樣啲，至於係咪真係從此踏上坦途，則不妨留意管理層的派息政策，何時可以調升派息，咁即係話業務已經康復得比較好。

企業CEO陸羽仁‧逢周一至五見報hightea@hkheadline.com