青心直說：見大陽燭收市咪開心住

一日挾升，一日狂質，短炒分子呢兩日非常開心，合埋雙眼睇橫行通道買入賣出冇難度，最難在於忍受市場情緒嘅壓力，因為當別人忙於追入時，你就要靜靜雞趁高位沽貨；當個個苦瓜乾咁話中伏，你就喜洋洋盤算做空倉回報有幾多，確係幾人格分裂。大市走勢冇方向，又係 Reset再嚟過嘅時候。恒指一日未能以大成交突破 20800企穩，見到大陽燭唔好咁開心住。大炒友呢個星期早已棄暗投明、棄股投樓，繼西環寶雅山低價賣首批單位，再加推加價大玩「層層叠」，越叠越高。聽代理話，認購到首批仲係八千零蚊呎單位嘅業主都幾大咬，加 10%都唔肯沽，等星期六嘉里縉城峰開盤，賣完首批廿幾個筍盤後，仲有幾大條件加價。行家仲話，全港各大小炒友已紮行馬入飛，希望重演寶雅山萬人空巷嘅盛況，再推高區內呎價。無獨有偶，新盤升溫，瑞銀分析員王震宇拍心口話樓價指數要見 97高峯。可惜中原施老闆已收山唔做節目，否則佢出一句聲到底樓市升幾多，勝過大家估估吓唔知入唔入飛好。
炒友棄股投樓

家啲新樓郁吓都萬一二蚊呎，幾百呎單位都要賣五六百萬，其實發展商同炒家都知，要獲利就好似喺刀口上舔血，人人諗住快閃。誰知內地水喉水長流，加息好，收緊銀根都好，內地有錢人都要將芝士搬家，香港當然繼續係首選。有冇留意內地收緊銀根後，地方政府陸續發窮惡，繼大龍地產北京天價地皮被收回，就連九龍倉（ 004）夥招商地產 07年投得嘅南京地皮，亦被收回，足足唔見咗 2.45億元保證金。仲有最新規定，要求投地首期由 3成加到 7成，兼要 7日內找清數，可見上下政策與對策角力又一明證。中央唔放水，惟有自己諗法子收水再重置資產，香港資產自然係首選。節目後同科大雷教授傾開，樓價升近 97年水平，唔好以為好離譜，話晒都過咗 13年，財富累積唔少，樓價貴影響最大只係普羅市民，有錢人同中產喺呢十幾年一樣咁有錢，買貴價樓有實力、有得守，點會唔升。胡孟青