陸羽仁 - 追落後變主題

復活節假後開番市，港股係威係勢，恒指以近高位21,928點收市，升39 1點，大市成交亦增至891億元。

中環茶友話，復活節和清明節中間經過三個交易日假期，外圍美股又創了新高，港股累積了一定的購買力，所以假後升高和成交上升，不足為奇，要睇睇後續有無力維持高成交，才見真章，若美元維持強勢，無大資金流入，港股未必咁易升番上好旺的水平，只能跟住美股走吓。

內銀內房殺上

但一踏入 4月，芬佬就有少少換馬炒落股的感覺，內銀股和內房股在第一季相當弱，昨日一洗頹風，有啲炒味。假期間有消息指，建行(939)集資計劃已獲國務院批准，打算今年在中港兩地發行A股和H股集資750億元人民幣，包括擬透過私人定向配售A股新股，集資不超過450億元；H股則透過供股方式集資約300億元。本來建行有意向股東伸手的消息，唔係好事，但當市場要佢升時，出現壞消息，反而可以因壞消息盡出而當好消息炒，結果建行昨日升4.2%，成為大銀行升幅之冠；另一巨股工行(1398)亦大升3.8%，之前集咗資的招行(3968)反而只升1.4%。

內房股亦有進帳，雖然升幅唔係咁全面，升得最多是去年才上市的恒大(3333) ，昨日急升8.5%，升番上3.59元，終於上番招股價，佢在上月25日跌過上市以來低位2,98元，連3元都穿埋，若果膽正命平在當時入市，兩個星期都唔夠，執番近20% ，假期前內地公佈第一季房地產銷售統計，按銷售金額計萬科排第一，賣咗145億元人民幣的樓；恒大排第二賣咗85億；綠城(3900)排第三賣咗79億；中海排第四賣咗76億，但按銷售面積計倒過來恒大排第一、萬科排第二、碧桂園(2007)排第三，顯示恒大在好多二、三線城市賣價碼低的樓，售樓速度升得幾快，可能恒大賣樓維持前列，吸引了眼球，加上佢下星期一公佈業績，開始炒緊業績。

走一轉博20%

其餘升得多啲有華潤置地(1109)升4.42%、富力(2777)升3.8%、遠洋地產(3377 )升3.3%、碧桂園(2007)升2.8%；反而龍頭大哥中海(688)只升1%。

茶友話，唔好以為芬佬唔炒股，有些芬佬興長揸，有啲興短炒，內銀股和內房股在第一季插得較殘，呢排抽咗上來，試想炒一轉隨時升番10幾、20個巴仙，咁走一走都幾和味。相對之下，出口股第一季已升咗十幾二十個巴仙，你想佢再升十幾二十個巴仙，唔係咁易啩，所以就炒吓落後，換吓主題。

雖然大市跟外圍向好，但係亦唔係人人睇好，法巴發表季度策略報告，預期亞洲股市在第二季有拉鋸戰，因市場焦點集中於息口走向及企業盈利，後向多變，投資者將傾向炒波幅，低買高賣，唔係單邊睇好。

法巴睇上落市，因而下調港股投資評級，由「增持」降至「減持」，維持恒指一年目標24,000點，潛在升幅只有約12%(以昨天收市價計只有9.4%)；它維持中國股票「中性」評級，維持國企指數一年目標14,200點；法巴建議增持印度、新加坡、馬來西亞及印尼股票。

法巴指，今年首季因市場關注亞洲股市流動性問題，美元指數期內升5.5%，隨亞太區企業相繼公布業績後，料無明顯再上調盈利預測可能，所以刺激有限。但以MSCI亞太區指數計，平均市盈率只12.3倍，仍低於長期平均13.3倍，估計現價有一定支持。