青心直說：齋聽貼士小心變點心

上周滙豐控股（ 005）擺明披上迷彩戰衣上陣，資金暫時撤退流出本港，要博市彈睇怕都要回補 21548/21748裂口，美股就借高盛單料乘機推牌，入市戒急用忍。明白都市人生活緊張，即使對自己搵嚟嘅血汗錢都唔多有時間打理，孕育出香港獨有嘅貼士即食文化，散戶睇股評往往視為投資貼士，睇完第二日開市驚死輸唔切不問價追入，關乎自己荷包點解會咁輕率？股市評論又好，大行出嘅報告都好，散戶要細心分析，唔賭唔舒服就以注碼控制風險。股評人選股，離不開事前留意到股價異動，有特大利好消息或見過公司管理層了解過營運情況。但大鱷亦非常留意坊間「心水推介」，當啲平時水盡鵝飛股份突然發茅，亦係佢哋勝利大逃亡之時，例子有剛公佈業績嘅聯泰控股（ 311）。
睇好聯泰　唔使急買

公司去年純利升 29%，由於大股東持有近七成同裕元（ 551）揸近 9%，末期息好慷慨派 1.831仙，可惜股價近日無端端炒起咗，拉勻全年息率得番 3厘左右。老牌紡織股聯泰客戶包括 addidas、 Polo Ralph Lauren等，由於上市首兩年業績同股價表現差強人意，到今時今日都未返家鄉。唔講唔知，其實佢已經化身內房股，去年將清遠工地改建嘅住宅項目「上河國際」，今年 8月陸續落成開賣。公司去年用 5340萬人民幣補地價，發展該處 42.4萬平米地皮，每方米補地價成本只係 126元人民幣，以當地二手樓現時每米賣緊 3000元人民幣計，成個項目閒閒哋賺十億八億。公司去年做成衣至賺 1.15億元，淨現金 8億幾，相當於每股約 8毫。不過投資者千祈唔好心急，皆因聯泰去年 12月初及今年 1月中都有股評人推介過，股價之後就見光死急插，近日又無端端再挾升，現價已反映業績同旗下樓盤因素。介紹好股唔代表叫大家即刻買貨，否則後果自誤！胡孟青