青心直說：黃金比率測市底

大市易跌難升，道指跌穿一萬點後仲未彈，可見美元拆倉威力厲害。總結去年 3月反彈市以嚟，可以話喺邊度跌低，就由邊度起番身，直至美元反彈，大圓頂下跌早已有迹可尋。世事就係咁奇妙，你越想鬥贏個天，個天就越似玩緊你。人類從未停過試圖喺股市搵出一個既定嘅軌迹，從而衍生出各式各樣的技術分析、陰陽燭，甚至坊間嘅各家各派獨門秘方炒股密碼。最近部份 Blog友更轉戰 iPhone，利用大家對 Blog友神秘身份嘅膜拜，每日喺網上畀股票貼士。網上世界真真假假，當娛樂睇吓無妨，重注跟風就要三思。網上的虛擬世界正孕育出一種創新敢言嘅出位文化，正面睇，為自由社會提供更多討論空間，等真理越辨越明，但從現今網上世界嘅動員能力同作風，特別係部份年輕人正瀰漫一種譁眾取寵、逢「唔啱心水」必反、挑戰權威嘅風氣，只要稍為出現較「出位」嘅反對聲音，事主竟遭網上狙擊，匿名網友四方八面以垃圾電郵、網上留言惡意中傷，甚至打投訴信畀公司要求炒咗佢。
可能跌到 18800

網上世界之所以可將負面情緒無限放大，更有能力對一些自以為弱勢群體一呼百應，全因黑箱作業嘅運作模式。網友不露面、不現身，說真說假毋須負責任，只要夠爆就可出位甚至出書，引嚟各方景仰。話政府唔聽民意，漠視小眾利益。呢班「小眾們」嘅作風又何嘗唔係「一言堂」，以網上暴力去控制言論自由，大搞文革式抗爭，對社會又有何得益？講咗咁耐，除咗有感而發，亦想帶出無論股神又好，索羅斯又好，甚至網上聖手都好，都冇必勝秘方。不過從眾多投資專家身上，卻可得出同樣嘅習慣——順勢操作。見到幾多散戶想撈底都冇用，血肉長城阻唔到大自然力量。黃金比率係眾多技術分析中，較能反映自然中嘅神秘定律，套用於市況上，由於大市低位反彈未能突破 0.618嘅目標（約 23700），剛好 0.382嘅支持亦喺 250日線，兩者巧合地同樣位於 18800附近，你話係咪用手畫都冇咁「蹺」。胡孟青