陸羽仁 - 愈否認愈像真

昨日港股受一片內地打壓樓市的烏雲掩蓋，所以恒指跌70點，收22138 點，都算跌得少啦。不過臨近尾市中移動(941)回軟，恒指跳水120點，由升轉跌，收報22138點，跌70點。

事緣上周末中國銀監會主席劉明康在海南出席會議，話銀行要嚴格控制房地產信貸風險，尤其要嚴格控制「為租而買，為賣而買」的房貸，更謂部份北京商業銀行審慎評估買第二套以上房貸風險，主動將二套以上的首期比例提高到六成(原本為四成)，劉明康稱這個水平才「較安心」。

劉明康的講話一出，嚇到市場震一震，香港的內房股更遭拋售，後來銀監會澄清，話劉明康只是引述銀行的自主行為，並非將監管底線提高，硬性要求將二套房的首期提高到六成。傳媒打到內地的銀行，多數都話二套房的首付比例不低於40% ，未收到通知改變，但亦有廣東的銀行分行開始將二套房的首期提高到六成，話政府要打壓房價咁話。

六成首期似層層

中環茶友話，內地的政策，愈否認愈像真，或者?家的確未有一個二套房首期六成的政策，但睇劉明康的口氣，非常鼓勵銀行嚴厲對待投資者或炒樓客的信貸，如果樓價再升，呢樣嘢唔使一日都可以變成統一的政策啦！

講開又講，有啲內地發展商又真係爭取落實，明知阿爺好怕樓價升得太顛，好心佢哋自己就檢點吓，有間中弘地產在北京朝陽北有個樓盤，本來出咗價單收咗客仔2萬元意向金，到昨日開售，突然加價3000元一平方米(即係大概加300元一方呎)，加幅15%，本來樓價20000元，咁樣突然加價，搞到啲客戶大鼓噪，早上一度包圍發展商架車，後來慢慢先至平息。

我話內地呢啲發展商唔知邊個係「揸弗人」，玩到咁大，當阿爺無到，遲到逼到阿爺出重招打壓樓市。

昨日幾隻內房股公佈業績，包括恒大 (3333)、龍湖(960)同恒盛(845)，佢哋就真係唔好彩啦，雖然業績都OK，但係遇上劉明康咁講，點都要跌吓交啲功課啦。恒大公佈09年全年純利10.46億元人民幣，較08年同期5.25億元增長99.4%，每股盈利7.4分，建議派發末期息每股0.7分；恒大這個盈利雖然唔多，但略好過去年上市時的預期，內地地產商的盈利要交樓才入帳，所以佢昨日發力買樓，盈利要今年才可入帳。

電訊設備股炒得勁

龍湖的品牌相當唔錯，佢買樓雖然唔夠恒大多，但樓盤亦甚有口碑，佢去年純利22.1億元，較08年同期增長5.65倍，每股盈利53.5仙，擬派末期息每股 6.3分。

照睇今年才是內房股盈利的高峰期，因為去年買樓多，但成本平，所以今年入帳利潤好正。大市唔就，昨日龍湖股價跌2.7%，恒大跌 3.4%。

昨日個股有炒作，中央日前表示3G建設總投資預計高達4000億元，重磅股中移動昨日早上曾一度突破80元高位，支撐住大市。臨近收市的15分鐘卻插水倒跌近1% ，收78.6元。中聯通(762)下挫1.6%，雖然電訊股唔掂，但相關設備股就有資金炒作。中國無線(2369)飆升逾13%、TCL通訊(2618) 升7%、晨訊科技(2000)升9%，齊創新高。另外，批咗股的卓悅(653)再創新高，快意節能(8032)擬引李寧入股，股價曾升2倍，收市升1.3 倍；北青傳媒(1000)去年多賺2.7倍，股價升9%；A8音樂(800) 公佈與諾基亞合作後，股價今創新高後升幅收窄，升6%。

hightea@hkheadline.com