陸羽仁 - 基金洗倉人踩人

港股彈咗一日就中招，前日升就乏力，昨日跌就相當大力，不過昨日跌都跌得好有理由，歐洲局面未定，南韓又好似想開火咁款，左一巴右一巴咁打落嚟，港股想唔死都唔得，連19000點大關都跌穿埋。

港股開市已經烏雲蓋頂，上日美股杜指跌127點在前，恒指低開350點，見1932 8點，已經唔算跌好多，但日股和南韓市愈跌愈有，日股跌3%，南韓股市跌4%，拖住港股向下。

歐洲信貸緊縮

杜指期貨亦愈插愈多，跌200點以上，港股就江河日下，最低跌至18975點，最後亦上唔番19000點，以接近全日低位18985點收市，跌682點，跌幅3.5%；期指收報18922點，亦跌626點，比現貨低水64點，國企指數收報10729點，跌513點，跌4.

6%，大市成交金額 679億元。

朝鮮半島風起雲湧，南韓一早就知道自己艘軍艦係俾北韓魚雷打沉，但拖咗好耐先至敢公佈，關鍵係唔知點收科，人人都知北韓係乜傢伙，係佢射魚雷又點，你同佢開火乎？所以南韓搞來搞去都係擺吓姿態而已。不過北韓金正日就有理無理，據說在上周四南韓公布調查報告那一日，叫北韓全軍備戰，昨日呢單「備戰」消息出街，搞到韓股、日股都大插。南韓圜已連跌4日，夾埋跌咗8%，跌得咁急，搞到南韓央行都話隨時要干預。我暫時唔信兩韓打得成，但咁搞法朝鮮半島局面難免動盪。

對環球金融市場最大困擾因素仍是歐洲，雖然歐盟出咗一萬億美元救市計劃，按美國的經驗，出呢招等同如來神掌第九式「萬佛朝宗」，難道歐洲出埋呢招都唔掂？照計如今都未知，但歐洲佬做嘢慢半拍，唔似美國佬咁快，歐洲央行講咗要放水做量化寬鬆，但歐洲市場仍然咁緊張，倫敦銀行同業拆息係咁升，已經是08年美國金融海嘯時信貸緊縮的小型版，可見市場人心好怯，但又唔見歐洲央行聯同英倫銀行有乜救火行動，好似啲火燒得快過佢地救火。到西班牙央行上周六接管了儲蓄銀行CajaSur，CajaSur唔係大嘢，其資產只佔西班牙銀行業總資產的0.6%，點計都只是一場小火，但點知都可以愈燒愈大，搞到美元又急升，包括美股在內的風險資產又急插。

破位向下風險增

中環茶友話，本來美股和港股在低位好似企定咗，但昨日又發作，港股跌穿咗19000點，美股期貨已穿10000點，港美兩地股市跌穿呢啲技術大位，論走勢又會插一浸，的確比較危。美股年初升咗，累積跌幅未算多，而家跌勢轉急，好可能係有歐資基金沽美股套現，回朝自救，所以後市先要睇吓美股插到乜嘢位，小心大市破位後短線再向下。

港股的二三線股呢幾日俾基金洗倉式沽貨，跌到七零八落，愈係基金愛股，愈跌得厲害，如早一日彈咗的東航(670)大跌14.4%，國航(753)跌8.7%；飲食股如青啤(168)走低9.5%，雨潤(1068)跌7.1%；醫藥及相關股，國藥(1099)挫8.6%；中國生物製藥 (1177)下挫13.9%。

呢啲股份係基金至愛，但跌超過10%又好似等閒事咁，主要因為基金開始不問價沽貨，芬佬見到個市愈跌愈急，之前沽咗壞股，而家沽埋好股，怕個市繼續崩落去，好多客戶會要求贖回，所以要先套現應付。貨愈來愈平，甚至有靚貨大賤賣，但只怕係賤物鬥窮人，自己無錢去買。

hightea@hkheadline.com 企業CEO陸羽仁‧逢周一至五見報