青心直說：斬倉盤撈底有路跟

記得早前一浸跌浪，唔少炒家日日即市高位「扑儍瓜」做淡，命中率相當高，希望佢哋山大斬埋有柴，閃身夠快，唔使一次過輸凸。講開扑儍瓜，英文叫「 Whac-a-Mole」，係美國佬 1971年發明，由於推出後大受歡迎，成為近代遊戲嘅參考藍本。扑儍瓜呢個遊戲喺咁短時間內深入民心，散播全世界，成功之道不外乎係每擊中一個「儍瓜」，即為玩家帶嚟快感及成功感。放諸投資市場道理亦一樣，最難唔係選股、買股甚至止蝕，而係幾時應該止賺、點樣情況下出手撈底。有儍瓜，當然有「錘仔」，識用就唔使做儍瓜──喺陰陽燭圖表上，即係長燭身跌唔死有運行嘅走勢，呢類訊號提醒投資者乜水平屬超賣，可以瞓身低位買返上嚟。噚日就有一對孖寶喺上晝「雙錘出海」，一隻係勝利管道（ 1080），突然喺 1分鐘內急跌三成落過 1.35元，其後急速反彈跌幅收窄。
開市睇實 20大跌幅榜

勝利股價急跌時，市場見唔到有大新聞，以為有春江鴨收到風公司唔掂，結果有理冇理人踩人，將呢隻全國唯一民營油氣管道供應商沽到上市新低。低位見到咁大支錘仔，撈底都放心啲。另一隻玩過山車嘅係國美電器（ 493），又係失驚無神喺開市冇耐被質穿 2.40元，其後急速回升，吸引資金大舉做淡，半日沽空金額罕有上榜，可惜淡友表錯情，股價埋單仲要倒升收場，極具戲劇性。點解呢兩隻唔相干嘅股份會一齊玩跳樓機？其中一個傳聞係同斬倉盤有關。咁樣不問價嘅沽售，同 1月 22日金鷹商貿（ 3308）無端端跌落 10蚊一樣，都係冇消息跟尾亂跌，好有可能係孖展客補唔切孖展慘遭斬倉。同類事件多發生喺市值較細、內地資金戀棧，同炒作概念極濃嘅二三線股身上。中央一聲令下要收緊銀根，調升存款準備金率，又嚴打違規貸款，預計類似斬倉事件只會與日俱增。有興趣發呢啲財嘅朋友，記得開市初段睇實 20大跌幅股份，沙塵滾滾殺錯良民，通常無啦啦跌得 20%嘅，博即日鮮都有着數。胡孟青