陸羽仁 - 靜過鬼等外圍

美股昨日延續升勢小幅上揚，港股昨早反覆靠穩，不過午後在冇乜好消息的情況下，恒指反覆回落，收報20422點，跌111點，大市交投依然淡靜，成交只有340億元。

累大市向下的主要係本地地產股，市場繼續擔心阿爺收緊銀根、內地豪客無水來香港炒樓，再加上月尾財政司司長將公佈預算案，亦怕有加豪宅印花稅等打擊炒樓措施。大市升唔到，地產股就有沽壓，長實(001)及恒地(012)跌1.3%；新世界發展(017)及信置(083)跌1.4%。

地產股怕財爺出招

內銀股係另一種「藥水股」，加存款準備金率的壓力亦在內銀股身上體現；本地金融股表現較好，其中滙控(005)收82.55元，逆市升0.3%，頂住大市跌勢。恒生(011)升0.3%、中銀香港(2388)亦升0.6%。

中環茶友話，港股雖然沽壓唔大，但有啲呆呆滯滯，部份投資者仲放緊假未開工，搞到成交大減。成交少就偏淡少少，即使已經開工的投資者亦唔多想出手，先睇清外圍情況，再謀定而後動。最主要嘅係睇內地A股春節長期假後復市嘅表現。

歐美的情況可以話係歐洲差啲，美國好啲。美國經濟數據唔錯，股市表現不俗；但歐洲方面就比較弱，未確定因素太多了。歐盟27國財長前日舉行例會，要求希臘在一個月內準備好採取進一步措施削減財赤，由財赤佔當地GDP的12.7%降低至8.

7%，否則將根據《里斯本條約》，要求新的削減開支措施，並提高增值稅、燃料稅和奢侈品稅，希臘屆時將喪失自主權。當市場期望歐盟馬上借錢俾希臘紓困，歐盟反而先要求希臘削赤。不過我認為歐盟呢個做法雖然唔太受歡迎，但方向正確。

希臘的問題可能比市場所知的更大，《紐約時報》早前報道，原來過去近10年，美國高盛等華爾街投行以貨幣掉期交易方式，變相借了很多錢畀希臘政府，這個報道引起全球廣泛注視及擔憂，因為貨幣掉期這些複雜的金融衍生產品，掩蓋了希臘政府債務的真實水平，歐盟要求希臘本周五前作出解釋，想了解佢包埋呢啲衍生工具在內的借貸真實狀況。

另外，更令全球投資者擔憂的是，好多其他歐盟國家，如葡萄牙、西班牙都可能好似希臘一樣，做了大量的掉期合約，隱藏大筆未為人知的「爛帳」。

歐羅好似殭屍彈

貨幣的強弱係反映一個國家或地區經濟的指標，所以歐豬五國的債務問題未解決，令歐羅弱勢持續。

你睇歐羅近期表現好似殭屍咁，有好消息刺激先至會跳一跳，上周喺歐盟猛話支持希臘嘅時候就彈一彈，到周一美股大反彈美元回落又彈一彈，之後呢兩日無乜特別利好消息就馬上回落，繼續偏軟。呢個就係弱勢嘅典型表現，其走勢就好似去年美元弱勢時那樣，要跌唔使搵理由，升先至要講理由。

所以中環茶友話，歐洲無可依靠，主要睇美股能否保持強勢。佢相信內地假期後情況也不會太壞，雖然人行再度提高存款準備金率，但股市應該仍然頂得住。投資者仍然要觀察內地市場喺上證綜指突破3000點大關收爐後，仲開唔開到紅盤？