陸羽仁 - 地產大好友的投資理念

美國總統奧巴馬宣讀來年預算，赤字天咁大，反映美國不敢貿然閂水喉，華爾街作出正面反應，杜指應聲彈高過百點收市，帶動亞洲股市上升，港股高開後先升後回。

美國雖然話復甦緩慢，但同歐洲相比，已係好得多。歐洲係金融海嘯中嚴重受創，好多國家財政都有問題，除咗已經爆煲的冰島同問題浮咗上面的希臘，仲有西班牙等國家，都受咗內傷，所以全球投資者對歐羅區前景戒心仲大。各國央行都不敢再大手吸納歐羅，令歐羅兌美元跌至近月低位，相信短期弱勢難改。

美財赤驚人谷高金價

華爾街陷入牛皮格局，主導了全球投資氣氛，美股周一反彈，內地股市先升後回，尤恒指最終以微升收場，收報20272點，微升28點，大市成交縮減至624億元，創1月4日以來新低。

最近傳言多多嘅大笨象滙控(005)昨日最高上過85元，尾市跌幅收窄至84.55元，稍稍跑贏大市。周一，英國《每日電訊報》報道，滙控非執行董事兼滙控北美區主席桑頓表示，希望持有三大中資國有銀行之一51%股權，而繼滙控集團行政總裁紀勤調任香港，滙控策略及策劃主管司馬安也會將辦公室由倫敦遷至香港，協助紀勤準備這一收購計劃，令有關收購的傳言，在倫敦也傳得沸沸揚揚。

對於收購傳言，好多業內人士都認為收購的可能性不大，但總之消息多多，就吸引咗市場注意同增加咗擁躉捧場士氣啦。

美國國財赤驚人，印銀紙無辦法停落嚟，消息一出金價大幅反彈，金礦股即刻番生。

昨日消息傳來，有「大好友」稱號的信和集團創辦人黃廷方仙遊，黃廷方白手興家，憑着對地產市場極度樂觀的態度，在新加坡和香港建立龐大的商業王國，近年兩地家族生意分別由兩名兒子執掌，信置主席黃志祥秉承父親信念，投地一樣不手軟，過去十幅政府拍賣官地，九幅落係信置手上。

投資如海洋划船分方向

過去信置(083)買地，經常被市場批評為買貴貨，呢個批評差不多維持了二、三十年，結果信置坐擁的資產不斷增加，見證了香港地產業係聚寶盤，反而怕買貴貨的批評者，往往因為太過審慎錯過了一個又一個超級升浪，從大好友一生經歷去睇，投資第一樣就係要睇啱大方向，大向方啱咗，就算買貴，只要有能力守落去，最終有日會贏錢；相反，如果方向錯咗，想去太平洋就划去大西洋，咁愈出力就愈弊傢伙！

黃廷方做地產置富，當然最鍾意叫人買樓，佢推銷方法好直接，就係香港地少人多，如果你想做生意，先買層寫字樓，將來生意賺唔賺唔知，但供到落嚟十年八載，就賺咗層寫字樓，已經非常和味啦！至於後生仔出來社會工作，供層樓作為自住居所，雖然初頭辛苦啲，但供完就有間屋，手頭點都有嚿資產，點都好過買其他嘢，一出舖頭就打幾折。

香港樓市幾年又有一個小循環，十多年一個大循環，好似六七八十年代，都試過大跌市，總體大勢是反覆向上，最緊要係睇中間一個浪冚埋嚟，小業主頂唔頂得住。大好友話有樓唔怕買的講法，最近一次嚴峻考驗，係回歸後八萬五期間，這個低潮經歷差不多七年，係香港地產史上罕有的漫長冬天，苦業主當時慨歎，有層樓等如有嚿債，一世要做樓奴，當時信置股價最殘跌到個幾銀錢，但捱過低潮，樓市呢幾年又變番有景，最近西環有個新盤開賣，呎價成萬銀，結果幾日賣咗過百個單位，足見樓市都幾熱吓，大好友的投資哲學，信徒又開始增加番。