陸羽仁 - 全球水浸享受「泡泡浴」

在「泡沫市」下，有不少網友話佢想買的股份價錢較貴，問我點算？其實這正正講到問題的關鍵，泡沫市的基本特點就是貴。
市場價格的存在，自然有其道理，你覺得唔合理，只因你用一個錯誤的原因去解釋，你以經濟開始復甦的綠芽理論去解釋，就會覺得個市升得太離譜。但換一個角度，以資金大量供應，催生泡沫的理由去解釋，就會覺得合理，唔係話股價反映公司目前看到的盈利能力，而係話搵到佢升的原因。
各國政府大力放水入銀行體系救市，銀行初時收到錢都唔敢借出來，所以無乜效，到經濟定番，銀行開始敢借錢出街，政府投入的基礎貨幣就以倍數咁衍生，產生爆發性的資金乘數效應，谷起資產市場。水多，資產有限，價格就急升。
年底股價更不合理
目前開始出現泡沫市，但仍然只是小泡沫，若經濟在下半年進一步回暖，而來自各國政府的資金供應沒有大力緊縮的話，年底至明年初的泡沫將會仲勁，那時就是大泡沫的來臨，雖然股市每段升得多，都會調整，但好可能係一級級反覆向上。換言之，若你覺得而家的股價太貴不合理，年底看到的股價，可能係更貴、更唔合理。
在資金充裕的環境下，面對這種市場，手上持貨不多者，只能趁每次顯著回調時入市，你可能會問，咁做又有無風險呢？答案係︰有風險。風險主要來自兩個方面，第一，金融市場出現第二波急滑。第二，各國政府抽走資金供應。
恐爆發海嘯第二波
先講第一項，各地財金官員一直擔心，金融海嘯有第二波，擔心源自經濟分析，美國樓市下滑會觸發環球銀行出現4萬億美元的資金黑洞，依家佢合共撇帳2萬多億美元，仲有2萬億美元未撇，咪可能爆第二波囉。
若假設美國樓市沒有顯著改善，這個黑洞的確存在，當環球市場信心脆弱時，銀行想唔大撇帳都唔得，因為市場不斷發掘其壞帳，逼佢撇帳，但當市場好轉時，市場不再逼銀行撇帳，銀行就可以分期分批等業績好時，慢慢消化其有毒資產。其次，若美國樓市好轉，亦令資產質素回升，減低毒性。所以，在市場回復信心時，金融海嘯第二波的風險仍沒有消失，但亦消減了。
更重要的問題是中國是否頂得順歐美消費市場的大衰退。這是我過去最擔心的問題，出口佔中國GDP三成，這部分以20%、30%的幅度大量下跌，只是出口已令中國GDP減少6%以上，若要保住8%增長，一來一回其他部分要帶來14%的增長，才可填補出口大減帶來的真空。但結果看到，中國透過政府投資，大量放水，真係可以頂住經濟唔再急滑。若歐美出現第二波海嘯，由於有了第一次的經驗，相信中國仍然可以頂得住，香港亦可以間接受到保護。
伯老「預警」繼續放水
另一個危險就是經濟復甦得好快，各國政府會改變寬鬆的貨幣政策。然而，美國是全球資金供應之源，而伯南克亦講明畀你聽，美國無咁快好，所以佢唔會咁快加息，亦唔會咁快改變所謂量化寬鬆的政策。只要美國唔收水，全球繼續水浸，大家就可以享受「泡泡浴」。
總括而言，參與這個泡沫市，當然有風險，但套用財經專家的術語，中而言，股市上行的機會比下行大。