陸羽仁 - A股點火紅股爆炒

恒指過去兩周累積升逾2000點後，昨日升勢未止，開市即重越20000點，上午曾高見20385點，再創本年新高，中午收報20246點。下午恒指在高位徘徊，收報20251點，漲268點或1.4%。期指收報20150點，升126點，比現貨低水102點，成交85027張。國企指數收報12189點，升205點或1.7%。紅籌上揚135點或3.4%，收報4115點。大市成交增至809億元。

昨日輪到中移動(941)發威，市傳內地敲定5間紅籌企業回歸A股，以中移動呼聲甚高，加上佢近日股價落後大市，中移動備受追捧，股價表現神勇，重上80元，收報80.35元，漲4.2%。大升4%，遠超大市的1.4%升幅，落後股有逐隻炒的味道。


近結算好友有力

相對地控(005)卻跑輸大市，倒跌0.61%，收72.6元。

杜瓊斯昨日報道，控旗下的加拿大豐銀行第二季業績改善，控昨早一度逼近74元，以7月13日低位61元計，兩周已累升約兩成，不過午後卻回軟，由升轉跌，以接近全日最低位收市，收報72.8元，倒跌0.6%，壓住恒指升勢，金融股表現最好係宏利(945)，升5%。

中環茶友話，大市企穩在20000點上收市，維持強勢，本周四期指結算，好友食住個勢，在期指結算前唔會咁易放生淡友。控會在下周一(8月3日)公佈的中期業績，未來若偷步炒控業績，大市在高位都會有支持。

正如早前預計，內地重開新股上市，會大炒一番，香港相關股份都會順手炒，較巨型的中國建築正在內地招股上市，中型股四川成渝公路A股昨日掛牌，炒到七個一皮，成渝今次發行5億股，發行價格3.6元人民幣，集資18億元，內地大炒家要索乾街貨唔係好難，所以昨日上午11時20分左右吸乾貨源之後，就瘋狂炒上，兩度爆炒至停牌，最高升到15.25元，狂升3.2倍，到下午近收市再復牌急速下跌，5 分鐘內股價唔見3分1，從最高的15.25元，回落至收市的10.9元，但依然較發行價大漲202.8%。該股首個交易日換手率已接近九成，炒家用40、50億就可以將大部份街貨圍起，炒高後一個轉身又可以沽番部份出街，單睇成渝咁炒法，內地股市又真係炒得幾顛。

相比之下，成渝在香港的H股簡直係大平賣，昨日抽升5.6%，收市都只係3.6港元，折合約3.2元人民幣，呢個例子證明股市短期而言只係炒供求，唔係講咁多理性，同一件貨，內地賣10.9元，香港只賣3.2元，雖然兩地股市不互通，但內地朋友自由行來香港開個戶口炒港股話到無咁易，但兩地股市偏偏有咁大差價，這當然是「不合理」現象，不過據過住經驗，股市出現不合理的情況時，短期內會更不合理。


上市概念轉身要快

內地新股爆炒，香港紅色股自然受惠，最好是同一家公司上A股，否則同系甚至同類股份都有得炒，例如A股申請熱到爆的中國建築，佢個仔香港H股中國建築(3 311)上周初開始亦子憑母貴，由3.2元左右爆炒上近4元水平，昨日收4元，升0.8% ，中國建築A股將在明天(周三)上市，A股集資額502億人民幣，比成渝大好多，係今年為止全球最大的新股上市集資，由於隻較大，好難好似成渝咁圍埋炒，內地證券界預計佢首日掛牌將有20至40%升幅，短炒佢個仔中國建築H股到明天都要睇位食胡啦。

另外內地股市大旺，光大控股(165)旗下的光大證券不止賺大錢，更密謀短期內在A股上市，光控股價就受惠抽高11%。中環茶友話，炒呢上A股概念，至緊要轉身快，一上市概念就燃燒，要睇位食胡換馬。