青心直說：炒股緊記見好識收

香江正上演銀行業《富貴門》，東亞錢莊隨時風雲色變，消息傳出即時又話係接近國浩集團（ 053）消息人士放風，話會喺市場增持，講到似層層，但最令人唔明白係既然靜雞雞收貨收咗咁耐，就嚟埋門卻突然玩高調？點會有人玩敵意收購前炒起股價，再喺市場吸咁儍仔 o架？平嘢冇好，所以超過 2倍市賬率都大把人爭住搶。其實要買好嘢唔一定要搶貴貨，正在賣盤嘅德國藥業巨頭 Ratiopharm，現時有包括國藥控股（ 1099）、美國著名基金 KKR、 TPG、仲有法國、以色列、冰島等大藥廠參與競投。Ratiopharm係何方神聖？起初話佢係做「基因製藥」，實情佢係做「非專利藥」（ Generic Drugs），而唔係 Genetic Drugs。



食糊止蝕均須及時
講番單刁，賣方叫價 45億美元，但據講買家出手極低，只係出緊三分二價錢。呢間德國首間非專利藥製造商，喺 1973年成立，成立一年內總收入激增 10倍，由當初得 13隻藥，到今時今日有 750種，係當地龍頭巨企。佢啲藥出晒名係以藥物成份後再加上.ratiopharm命名，簡單易記，深受醫生歡迎，可以話開創非專利藥嘅先河。雖然近年市場份額減少，頭 9個月 EBITDA仍維持約 1.9億歐元，公司預期到 2014年每年複合增長 20%。一隻咁好嘅現金牛點解要賤賣？原因係一場金融海嘯令全球富豪榜排名 94，亦即係呢間藥廠老闆默克勒（ Adolf Merckle）債台高築，輸咗百億港元。最後 74歲嘅佢睇唔開，留下遺書，瞓身火車軌自盡，幾個月後銀行 Call Loan，家人惟有變賣家業。投資市場是殘酷的，見你病梗係攞你命，將個價有咁低㩒到咁低，情況同博智買入 AIG嘅南山人壽異曲同工；但當有風時就會駛盡，好似國浩苦心經營道亨十多年，然後以 322億元賣出一樣。總之商場如戰場，投資短炒亦一樣，見好識收，唔好對消息跟尾嘅炒股有過份憧憬，見升時食糊，見跌時止蝕，用屁股會比大腦思考更勝一籌。胡孟青