陸羽仁 - 併購概念有得炒

港股上高位後整固，恒指昨日輕微高開33點，就反覆回軟，收報22,397 點，跌229點，跌1%，成交還保持到709.5億元。藍籌股中升得較勁係中信泰富(267 )，佢旗下澳洲礦商將向內地鋼廠提供鐵礦石，中信泰富急升9%。

外圍市場稍定，收購合併潮又湧番出來，早前美國卡夫提出敵意收購英國吉百利，如今仍然唔上唔落。科技股巨人惠普又公佈動用270億美元現金，收購網絡供應商3COM。

幾隻熱炒港股都係炒收購合併，最惹人注目的仍然係東亞銀行(023)，焦點繼續係國浩集團(053)是否會出手增持甚至狙擊東亞銀行，東亞先升後回穩，雖然升幅收窄，但全日仍錄得近2%升幅。東亞股價午後升幅收窄，同國浩及東亞分別發表聲明，語氣為收購戰爆發的機會降溫有關，不過，同中環猛人傾起，猛人有不同睇法。



東亞古仔無咁快完

首先，猛人話，當年國浩出售道亨銀行，作價差不多等於市帳率3.9倍咁高，現在東亞市帳率只係兩倍幾。除了豐、渣打同恒生、東亞同當年的道亨，已經係本地最大銀行，所以估值不應相差太遠，何況東亞仲有做得不錯的內地業務，對國浩講，現水平買東亞，等如高沽道亨、低東亞，仲有相當水位。

猛人話，仲有一樣要睇，係東亞股權分佈，因為目前李氏家族，遠遠低於足夠防守的水平，如果要保持絕對控制權，要有其他主要股東好似西班牙銀行同中銀支持，再加上其他大戶幫手，先至夠穩妥，照睇李家手上的籌碼，仲未係好夠，所以就算國浩暫時未發動攻勢，不代表日後不會出手，所以水位一低，李家股權就會露出空檔，國浩隨時會再買，所以可見將來，呢隻股仲係易升難跌。

另一隻併購股中策(235)昨日就大幅回吐，昨日高開0.84元，之後反覆插，最低見過0.67元，收0.71元，仍跌12.4%，如果前日追入定一成止蝕，昨日已經打得靶。由於中策潛在可以發到近1300億股，昨日跌完仍等如920億市值，一都唔平。

最頂癮係中策成交大得驚人，昨有11.3億股成交，佔已發行股數48%，好多股份一日唔止轉一次手，我都好怕呢大成交，混亂中都唔知邊個沽邊個，有散戶話炒中策等如炒輪，抱咁樣心態去炒就無壞，但炒佢要作最壞打算。

大福都炒易手

呢排炒開併購，連「彤叔」鄭裕彤手下做證券的大福證券(665)都傳俾人洽購，昨日大升12.9%，收4.55元，隻本來已經炒得好靚，一級級咁上，昨日傳收購更急升。證券股呢家，市靜唔值錢，市旺有人搶，大福現價32億市值，16倍PE，2.9厘息率，話平唔平，但如果有人要玩大中華概念，例如借香港內地，或者內地公司想買個香港證券生意玩，都咪話唔搶手。民營的民生銀行(1988)昨日公佈上市詳情，計劃發行33.2億股H股新股，招股價介乎8.5至9.5元。民行預期截至200 9年12月底止純利將不少於110億元(人民幣，下同)，招股價相當於預測市盈率15.0 8至16.85倍；該行09年如果做到110億元純利，升39%。茶友話，民行基本因素唔係咁正斗，但新上市都有得炒一炒。