陸羽仁 - 大時代一日一首富

美國聯儲局議息後決定維持低息，美股上日先抽後回，恒指昨日低開21 0點，其後在低位反覆爭持，上午最低跌逾240點，上證綜指午後在上海迪士尼樂園概念股領漲下，重拾升軌，收市連續第3日創近3個月新高。恒指跟隨收窄跌幅，但始終受制於21500點，恒指收報21479點，跌135點，期指收報21431點，跌105點，比現貨低水48點，成交60242張。國企指數表現好過恒指，收報12805點，微跌25點。大市成交微增至608億元。

壓住大市升勢的主要元兇仍然是兩大重磅股控(005)和中移動(941)，大笨象受美國金融股不振拖累，全日在85元水平窄幅徘徊，收報85.25元。



半年、一年谷出巨泡

大市雖然略跌，但似一個打底格局，只要美股唔大插，港股即使有回吐亦無大災。股神巴菲特以34%溢價入股鐵路公司BurlingtonNorthern，條數點計市場仍然議論紛紛，一個熟悉美國市場的茶友話，股神有另一種計數方法，因為Burlington Norhtern的重置成本高達每股197元，即係要用咁樣價錢，才可以打造番Burlingto nNorhtern而家的鐵路網，股神以每股100元收購，以資產重置價值計只是半價收購咁話，所以股神係股東睇到家公司的真正價值，認為係好盤。

美國聯儲局決定唔加息，並暗示低息長期不變，引發市場議論紛紛，我在網誌提到超級淡友、紐約大學教授羅賓尼(NourielRoubini)的評論，佢話聯儲局維持低息，令美元疲弱，就是「所有套利交易之母」(套利交易即借美元沽空，然後買入高息貨幣或高回報資產)，推遲加息等於把套利交易延長到明年，谷大資產泡沫。

不過羅賓尼亦同意這個泡沫還有半年、甚至一年可以再膨脹，但最後在美元急速回升時就會爆破。

記住無人話泡沫明天會爆，過早睇淡會好痛苦。如果炒樓會被政府打擊，炒股會就唔會觸怒政府，結果就有更多錢轉去炒股。昨日大市下跌，但好多股都開始郁郁貢，當然最戲劇性係新上市的內房股恒大(3333)，佢昨日首日掛牌，一洗近日新股上市潛水的頹風，高開4元，已比招股價3.5元高14.2%，開市初段升上4.2元的高位，跟住慢慢回，長時間在4元上下浮游，不過到下午3點左右發軟蹄，跌到3.8元。

當時經紀張打電話來問，話有客在4元買，有震，我吹水咁講，呢隻有咁多大孖沙入局，照計唔會升咁少咁快就散場？仲有，恒大主席許家印靠隻股上市問鼎中國首富之寶座，將來好難講，上市第一日唔會咁失威？條數係咁計，內地胡潤百富榜首富本來係比亞迪(1211)主席王傳福，市值約461億元。而許家印夫婦持有68%恒大股份，若恒大造4.5元，他的身家就和王傳福相若，若果恒大第一日以3.8元收市，咁許家印都唔夠過癮。

中航科工慢慢變身

我怪論聽到經紀張耳都側埋，但點知我講講，恒大就一級級咁升番上去，3.9元、4元、4.1元……升到咁上下，我直頭聽到經紀張間行內有散戶好似《大時代》套戲咁，大叫4.6元、4.7元，真係誇張。結果講都無人信，恒大最後更抽升至4.7元收市，較招股價3.5元高34.3%，呢個價點計都夠許家印做得成首富。散戶每手1000股帳面賺1200元，認真不俗。恆大發行16.15億股，昨日成交12.1億股，涉及金額49.5億，牌面睇有75%股份轉手，散戶即日鮮炒新股要沽都沽得七七八八，貨源將更集中。

我們正處於中國經濟大發展的時代，國內大量巨型公司開始在內地或香港上市，若主要股份由私人持有，一上市就變一個首富出來，都咪話唔誇張。這是一個10 倍速時代，會產生大量富翁，亦係散戶跟風搵銀的時代。當然，機會同風險並存，搵食就要執生，自己要識控制風險啦。

昨日有幾類股份都炒得好勁，我早前在網誌提過會變身的中航科工(2357)昨日公佈在母公司互換資產，換走汽車業務，換入航空工業，一步步變身做阿媽的航空工業在香港上市旗艦，而家十步只行一兩步，未來仲有好多資產要注入上市公司之內。中航科工昨日大升24%，收3.09元，不過大家小心佢抽高後會回，升得急唔好高追。另外，家電類股份逆市大升，海爾(1169)、科龍(921)及創維(751)同創新高。