青心直說：商品大王火併末日博士

美國聯儲局亂放氣球，又傳退市、又傳加息，結果出到嚟係唔做唔錯，繼續維持長期低息，即係話美國經濟根本冇好過。金價急升創新高，反映央行都唔太信任美元要轉為持有資產，搞到商品大王羅杰斯同末日博士魯賓尼隔空互片，一個講金價要見 2000，一個話佢豬噏唔使聽，無論經濟定政治都亂七八糟。治亂世，用重典；活在亂世，最怕運滯。日本女人好明白呢個道理，近期出現一班「歷女」族，最愛古裝武士男，連早前由梁朝偉同金城武擔演嘅《赤壁》影碟都大賣，係歷女必睇之作。亂世下人心虛怯，安全感最緊要，不切實際嘅少女想投靠武士，較年長一群就憧憬嫁和尚。你冇眼花，和尚已成為日本女性的理想談婚論嫁對象。皆因日本和尚可以結婚生仔，部份仲會食肉，就好似基督教牧師咁，一樣可以享受家庭生活。隨住經濟不景氣，原來最旺嘅唔係卡拉 OK，亦唔係戲院酒吧畀人發洩，而係寺廟，經濟越差香火越鼎盛，和尚荷包越水漲船高。



亂世和尚更好搵
原來和尚喺日本好搵錢，即使喺地鐵站披住斗笠攞住缽仔要錢嘅都要輪班制，但呢啲只係濕濕碎，因為全日本嘅墓地都係由寺廟經營，死後要法師取法號至可上西天，結果又要畀一大筆，仲有各式各樣嘅法事念經，死人生意真好搵。咁男人靠乜？年輕一輩失業、低薪，造就越嚟越多「草食男」，乜都唔做只顧玩樂，唔拍拖唔結婚，對自己及社會失去安全感。原因之一係財富分佈不均，根據日本央行數字，去年咁差嘅日子，日本人均現金資產仍超越美國，家庭總資產超過 1400萬億日圓，係日本 GDP嘅 3倍，不過財富主要集中 40歲以上人口。喺呢千萬億日圓當中， 56%係現金資產，可見上咗年紀嘅高資產高收入一族，雖然繼續高薪厚祿，但唔肯用錢，經濟都係冇救。香港情況越嚟越似，後生嘅買唔起樓，家境唔好嘅上進一群越變得無望，貧富懸殊令中產透不過氣，這才是市民對政府怨聲載道的主因。胡孟青