陸羽仁 - 錢會繼續！

上周美國發生不少影響未來經濟走向的大事，聯儲局開會議息，暗示一段時間維持超低利率不變；到上周五美國公佈失業率，跳升到10.2%，衝破10%大關，是1983年以來最高，亦超過市場的預期，近年美國失業率的歷史高位是在82年12 月創下的10.8%。大家見到美國的最新失業數字，終於知道聯儲局為何暗示長期不會加息了。

美國勞工部公佈10月職位減少19萬個，比市場預計的17.5萬個多，市場原本預計10月的失業率和9月持平，也是9.8%，怎料卻急促抽升。



失業升民望腳軟

失業率高企令美國總統奧巴馬都腳軟，2007年12月經濟還在高峰時，美國失業率只有4.9%，如今已突破10%大關，單計今年1月奧巴馬上任總統以來，美國也損失了349萬個職位。雖然奧巴馬聲稱他推出的7870億美元的挽救經濟措施，直接或間接創造了64萬個職位，但如今的就業情況顯然未能令人滿意。

上周五失業率數字面世後，奧巴馬急急補鑊，話「我的團隊正在研究新的拯救經濟意念以創造就業」，同時馬上簽署法案延長房屋買家有8000美元稅務優惠的期限，又將為失業者提供失業保險的期限延長20個星期。

奧巴馬急得如熱鍋上的螞蟻，佢上任10個月，民望已開始急跌，失業率大升顯然係致命傷，上周兩個州改選州長，奧巴馬所屬的民主黨候選人全線敗北，如果話紐約州無黨派的現任州長彭博係強手，打佢唔低亦無話可說，但民主黨人在維珍尼亞州做了8年州長，在民主黨主政白宮的年代竟然也敗選，就明顯是一個警號。

美國眾議院明年進行中期選舉，改選部份議員，參議院更會大幅改選34個議員，又有37個州的州長要改選，這一眾選舉不容有失，否則民主黨會失去參議院和眾議院的控制權，又會變成一個弱勢政府。

遇壞消息美股升

失業率公佈後，金融市場大波動，但美股見壞消息不跌，杜指反升17點，升到10023點，重上10000點大關。美元跌、油價跌；美債升、黃金升，因為市場估經濟需求弱，美國將長期維持低息狀態。美元匯價向下走，以兌日圓為例，美元上周五由前日的90.71圓，跌到89.88圓。黃金成為避險工具，12月期金連升5日，上周五升上1095美元，再逼近1100美元大關，整個星期計已升了5.3%。

美股無大跌，皆因出現咁差的失業率，無人估美國可以好快加息，?家睇明年上半年美國也會維持超低息。熟悉美國的高人話，聯儲局主要睇住兩個因素議息：通脹與就業，?家係通脹不高、失業高企，聯儲局那能在失業率達26年的紀錄高位時加息呢？利息唔會加，資金大量供應，股市自然有得炒啦。

明知係泡都要谷

失業率數字公佈後，市場對明年加息的預期進一步推遲，以利率期貨的交易價計，原本市場預計有63%機會聯儲局在明年6月的會議，至少會加息0.25厘，但看到最新的失業率後，利率期貨價格變動後，反映這個機率跌到52%。即係話市場中人預計明年中開始加息的機會只有一半。

最近末日博士、紐約大學教授魯賓尼(NourielRoubini)和商品大王羅傑斯(Jim Rogers)隔空罵戰，魯賓尼話羅傑斯胡說八道，羅傑斯反指魯賓尼白癡。事緣魯賓尼認為美國長期低息會觸發投資市場泡沫，話金價唔會好似羅傑斯咁講升上2000美元，呢個泡沫等多半年、頂多一年會爆。結果惹起商品大王羅傑斯強烈反駁，話魯賓尼無做功課，商品早前大幅下跌，如今升得雖多，只是反彈，唔使擔心黃金和新興市場股票有泡沫，如今唯一有泡沫的東西是美國國債。

事後魯賓尼再回應羅傑斯的批評，話?家沒有通脹，也沒有近乎蕭條的衰退，黃金無理由升到咁高，可能升到1100美元，但升到1500美元或2000美元就太荒謬，話升到2000美元簡直是「胡說八道」。羅傑斯聽到魯賓尼咁回應立即起火，話佢係「白癡」咁話。(詳情見我在上周四和上周五的網誌)

大餅發脹齊搵銀

雖然兩人對商品或新興市場股市目前是否有泡沫，存在嚴重分歧，但兩人其實亦有好多共同點，最大相同是認為美國咁樣印銀紙法，短期內會令美元大跌，激發資產價格大升。一個更白癡的問題應該係：既然咁多人都睇到美國這樣大印銀紙得印出泡沫，後患無窮，點解佢唔識得停呢？

答案係美國已走上一條不歸路。美國政府明知未來會有谷出資產泡沫的危險，佢都會焗住去，做總統唔諗得咁長遠，控制住失業率搞掂明年的國會選舉先算啦，若果?家好道學咁話唔好印咁多錢，怕將來谷出泡沫，結果唔使幾耐民望大跌，說不定未做到任期尾，已經俾人掘出乜醜聞出來搞到要落台。所以即使今年有破紀錄的1.4萬億美元赤字，奧巴馬?家仲話要諗新刺激經濟方案，所以一句話：錢會繼續。

既然明知美國會繼續大印銀紙，特區政府話到明唔想樓價升，一升就會做，所以樓價都係回軟後橫行居多，所以買樓不如買股啦，最近已看到本地熱錢有少少回流股市炒股之勢。

散戶見恒指在21000點樓上，可能有畏高症，怕大戶推高港股派貨俾散戶殺番落去。不過我的睇法有少少唔同，市場的主導者仍是美資大戶，他們睇透美國政府的策略，美國短期內仍會大印銀紙，錢湧向中國等新興市場，香港在中國邊緣，股市已經赤化一半，所以在三個月到半年內，在整個大餅發脹的環境下，都係炒升容易炒跌難，整個餅在膨脹中，不是零和遊戲，可以齊齊搵銀，大戶無必要在資金氾濫的時候玩跌市，當然半年後如果真係升到出大泡又作別論。所以見到美國失業高企，我的總結是：上升的風險比下跌的風險大。