熱錢點都會流走

以前抽新股只會聽到D人大嘆中得少或者抽唔中，而家就相反喇，抽中新股果D股民，通常會大叫「死喇！又中喇」，所以話人人都做同一樣嘢，風險都真係幾高。

唔講提起都覺得煩嘅新股，講返個市，相信而家無人會質疑港股係屬於資金市，咁資金市究竟要睇咩呢？當然係市場人士嘅心理，但係心理唔係非黑即白咁簡單，亦好難量化，散戶可以做嘅，就係留意港匯嘅變化，呢兩日港匯又再一次去到7.75左右嘅強方保證區，唔單止反映港匯嘅強勢，亦代表再有資金流入。

如果各位聽眾夠細心嘅話，應該留意到，每次港股急升之後，通常一兩日左右就有資金流入。呢個咁特別既情況，好明顯係國際投資者大手大手咁掃完貨之後，喺交收日之前要買入港元找數啦！



掉轉頭諗，之前個市跌左成千點，即係佢哋沽貨居多，點解D資金無流出，仲好似有流入添呢？

有人話，呢D大鱷實有方法暗地裏走資。骷髏會唔排除有呢個可能性，不過就算有都唔係大數目，鍾意抄小路，有佢一定嘅難處同風險，絕大部份嘅人係行大路，所以香港亦都真係有出票據去吸收呢D大路資金，證明升市會引來資金，到跌市個陣，大家又唔會見到D資金流走。所以，就算股市平均PE有23倍，而家仲可以靠D資金暫時咁支撐住。

當然，同新股熱潮一樣，當估值偏離價值太遠，音樂一停，接火棒嘅人就要付出代價。呢個資金市都係，你以為熱錢留左响我地個股市，就可以將港股係咁推高。但係，大戶始終要獲利走人，到時股票市場同港匯都會掉頭大幅向下，大家要打醒十二分精神啦！