曹仁超 - 投資者筆記 - 富不過三代的魔咒

10月26日，周一。自從已故總統尼克遜1971年8月取消布列頓森林協議後，定期存款便唔再係「安全」資產，並面對購買力不斷被侵蝕，上述情況至今不變。如以金價計，過去三十八年美元共失去95.7%購買力，即今天20美元購買力只相等於1971年1美元。另一方面，自1971年起全球經濟泡沫一個接一個，一個泡沫爆破後，另一個泡沫又再開始，周而復始。

從2007年9月金融危機至今，美國聯儲局及政府共借出、支出或擔保11.6萬億美元。上述資金主要流入金融系統內，令金融資產自今年3月起大幅上升，亦令美元自今年3月起貶值15%、金價上升20%，但至今並冇令CPI上升（因為冇流入消費市場）。10月份調查報告顯示，有36%美國人今年聖誕消費將較去年減少。


金價續在憂慮中上升

今年第二季全球各央行共增加外儲備4130億美元（其中37%係美元，過去十年平均數係63%，日圓及歐羅卻成為吸納對象）。JP摩根大通估計，今年第四季金價將在1050至1100美元之間上落，未來金價繼續在憂慮中上升。

今年3月6日開始美股反彈市係咪已在10月份結束？由於樓價自2006年高峰回落30%、失業率接近10%，理論上股市完成大反彈後，新一輪跌市好快又再臨（十分簡單A、B、C理論，即完成A浪下跌，必出現B浪反彈，然後再進入浪C下跌）。

1994年2月前美國財長Lloyd Bentsen要求日圓升值，到1995年7月美元價失去20％價值，但由1995年7月到2002年1月美元升值47％。上述例子並非鮮見，1987年美國股災後，前財長James Baker亦曾要求西德馬克升值，唔少人估計1987年10月股災後美國應放寬銀根，但1988年美國卻收緊銀根，令美元價上升。今年10月各位要小心係美元價止跌回升而非進一步回落，因為今年3月美元轉弱部分理由係投機者進行利差交易（Carry Trade），即借美元去買其他國家股票甚至石油合約同黃金，因為借美元成本太太太太低。10月6日澳洲宣布加息0.25厘，至3.25厘，相信下一個係加拿大；估計未來六至九個月大部分國家皆進入加息周期，大大限制未來六至九個月呢D國家股市升幅。

經濟衰退不但冇拉近貧富懸殊，反而進一步擴闊兩者差距。去年美國年收入138000美元以上10％家庭，較最低收入12000美元以下10％家庭收入多出十一點四倍（2007年多出十一點二倍）。去年美國中產家庭年收入共50303美元，較2007年52163美元下降4.6％，為1997年以來最低。不過，美國最富有1％家庭年收入仍佔全美國總收入25％，更係1967年以來最高（數字來自美國人口調查局）。去年香港GDP 14740億港元，1％香港最富有家庭（約二萬五千三百五十多戶）如佔去總收入25％，即香港平均每戶最富有家庭年入高達1440多萬元，由此可見幾咁富有；反之，目前月入6000元以下香港家庭數目亦在不斷增加中。

香港「敗家仔」出現機率高富不過三代？中文大學9月發表研究報告指，香港每百個家族企業中，到孫兒一代仍然十分成功只有三家。香港到第三代敗家仔出現率高於台灣及新加坡一倍。理由係香港富豪第一代太成功，到第二代接手時，唔少企業已係市值過百億元公司，管理以千計甚至上萬名員工，業務遍及全世界咁龐大企業，一般CEO亦未必能管得好，何況出身豪門世家子弟？佢地唔少留學海外回港接手後，同企業內老臣子意見不合，數目不在少數。

根據豐私人銀行與顧問公司合作研究結果發現，華人家庭企業由第二代接手後，約70％家族企業未能超越創辦人年代，成功只佔30％。能夠順利過渡到第三代仍然成功家族企業更少。研究報告指出，要家族企業能一直發展落去，第一代領導人必須懂得放手，擺脫傳統觀念「父傳子」此無形枷鎖。企業管治上增加透明度及引入外人協助管理，建立良好制度去平衡可能出現新舊文化衝突（例如子女海外學成歸來與舊臣子之間矛盾）。第一代創業期，公司規模細，生存空間受威脅，企業內容易產生槍桿子一致對外想法，因當時共同敵人在企業之外（即來自其他企業的競爭）。但到第二代接手之時，企業已有一定規模，外間威脅下降，反而內部矛盾浮現。企業矛頭很容易由「槍桿子一致對外」轉為「內耗期」。第二代與老臣子之間的矛盾，甚至第二代之間的互相矛盾，到第三代企業內部矛盾激化成為你死我活的鬥爭，已無暇理會企業的死活。

富不過三代另一理由係過分富足的生活容易引發道德敗壞，道德敗壞的結果令人失去價值觀，進一步失去分析能力，僅憑印象去決定一切。領導層受到貪婪及恐懼感支配而作出錯誤決定，並帶來失敗，此乃「富不過三代」咒語靈驗另一理由。今天內地企業亦面臨第二代接班人問題，香港企業更面對第三代接班人問題；點樣打破「富不過三代」咒語？將關係到香港及中國未來經濟表現。


和珅紀曉嵐各有功用

一直以來，中國人將家族文化看成主流文化，過去皇親國戚往往可分享國家的權力，甚至揮霍國家的財富，所謂「欽差大臣」大部分由皇親國戚出任，作為掣肘群臣之用而成為特權分子，甚至逍遙法外。包公能流芳百世理由，係佢以臣子地位敢拿違法皇親國戚去正法！今天華資企業大股東仍操控企業職員生殺大權，一派「我就是制度」的作風，結果令下屬成為唯唯諾諾的人（有誰敢逆大股東意思？）。大股東往往喜歡在企業內形成兩派，以便利於自己操控。例如乾隆皇利用和珅和紀曉嵐的對立，由紀曉嵐去辦事，並利用和珅去打小報告控制紀曉嵐。今天本港唔少大企業內，亦係有一批職員為公司賣命，另有一批職員以向老闆打小報告為生，因為老闆需要呢批人去控制為自己賣命者，以廣布線眼。反之，西方企業管治模式係股權高度分散及高度流動性，股東在大會上選出董事會成員負責管理公司，由董事會委任CEO及其他高管人員（並以股票期權去吸引佢地為公司創造純利）。至於日、德企業是股權高度集中，流動性小，不少企業由「利益相關」公司互控，銀行往往亦係企業債權人及股東，不但提供資金，同時發揮監督作用，員工亦參與公司管理，有唔少企業提供終身僱用制去保護員工利益。華資企業由於由家族成員掌握控制權及決策權，對外依賴性弱，企業成敗往往由家族內能否出現領袖人才去決定；加上排他性強（外人很少受華資大股東重用），成敗往往由家族成員中少數人決定。近年上市國有企業，最大股東係國家，高層往往同時係黨員，極易獲國營銀行支持，情況有點似日德企業；但亦有人際關係，因此又似華資企業。由於國家係大股東，國企需要照顧股東利益。國企能否集東西方管理優點於一身？木宰羊。


德國可重新睇好

戰後西德經濟一直享有高GDP增長率及低通脹，漸令西德人民享受到全歐洲最高生活水平。1989年柏林圍牆倒下，翌年東、西德合而為一；1991年西德政府宣布一東德馬克（Ostmarks）可換一西德馬克（Deutsche Mark），上述決定一下子令東德勞工成本變成全球最貴，因為佢地只能提供蘇聯式工作效率及技術，卻要求收取西德工人薪金，結果令大量東德人失業，並依賴西德政府提供福利金過活。二十年後今天，新一代東德青年已長大，整個德國競爭力在恢復中。今年德國政府財赤估計只係GDP 4.6％，較所有OECD國家低！2008 ╱09年度（6月30日止）德國收支盈餘1794億美元，都相等於該年度GDP 4％；加上德國人的儲蓄率高達12.8％（今年美國人只有4％，2007年更接近零）。

今年3月起美元價大幅回落，加上歐盟其他國家經濟陷入衰退令德國經濟前景仍未明朗。不過，2010年德國已較1990年時強許多，二十年前西德政府同意一東德馬克兌一西德馬克所作錯誤決定，經二十年努力，依家已扭轉過來。我老曹從今天起重新睇好德國。

日本1990年並冇東、西德合併問題，但資產泡沫爆破，令日本經濟進入長達二十年衰退期。日本嚴格限制外國人移民到日本（甚至外國女子嫁畀日本人亦不得入籍日本）。隨日本女性收入上升，願意結婚日本女性大減（超過50％），形成日本出生率下跌。目前每一日本家庭平均只有一點三個孩子，從2007年起日本進入人口下跌期。日本希望2010年利用中國經濟上升重新帶動日本經濟向上，新上任首相已轉為親中，希望更多日本產品進入中國市場，重新帶動日本GDP上升。

在股票市場最易賺大錢方法有二：一、在經濟上升周期，追隨畢非德所採用價值投資法，因為在經濟上升周期，唔少股份被錯誤定價（mispriced），在其真正價值未被一般人認識前，如能發掘出來長期持有，肯定賺大錢，例如七十年代上市長實（001）、新地（016）等；以及八十年代上市思捷環球（330）、利豐（494）等；隨佢地價值逐漸被認識，股價可以倍數計上升。可惜香港經濟上升周期到1997年7月完成，借問1997年後上市的港資企業中，有邊一隻在過去十年能帶來巨大升幅？反之，紅籌、國企甚至內地民企，卻成為1997年7月後港股生力軍，因為中國經濟仍處上升周期。


投資者常犯錯誤：

一、唔分清方向，常站在路中心，結果無論跌市或升市都被車輾死。

二、一年內最賺錢項目通常只有兩、三個甚至有四個，唔可能天天都有。請投資者減少每年買賣次數，做神槍手唔好做機關槍手（亂掃一通）。

三、不要嘗試捉住下跌中刀已係老生常談，但唔少人一犯再犯。

四、大部分日子唔好炒賣細價股，只有在極少數日子裏細價股才可跑贏大市。

五、2007年11月開始，香港股市已進入Trader's Market，唔再係「買入後長期持有」日子。

六、It is not a stock market, it is a market of stock.（股市只係一個提供股票買賣市場而已。）在牛市可以賺錢，在熊市中可以發大財。（Make Money in a Bull market, Make Fortune in a bear market.）一切看閣下眼光而定。

七、如果你冇去別人「婚禮」，請亦唔好參加別人「喪禮」。多少人眼見一隻股份由1元升上2元，再由2元升上3元、4元、5元、6元、7元、8元……最後忍唔住手在9元買入，然後睇住佢股價由9元回落到8元、7元、6元……機會失去了，就讓它溜走吧！

八、今後日子裏，Timing is everything。學習如何掌握買賣時機。

九、買股票唔係買名氣。1981年佳寧；1997年北控（392）；2000年電盈（008），在當年都係名氣十分大股份，結果點樣？

十、獲利回吐唔係賣出一隻股份理由。買入一隻股份係因為你相信佢未來股價可以上升，賣出理由亦一樣，除非你擔心佢股價在未來將回落才賣出，而非因為已有利潤而出售。請記住止蝕唔止賺！