青心直說：你玩油？油玩你！

潮流興玩新能源，繼股仔各出奇謀玩變身轉型，結果股價高飛曲墜老散慘遭中伏，連財政部都要趁熱鬧，打算撥出部份燃油稅支持新能源發展。有關安排據悉有啲似以前「電價分攤」機制，喺用戶每度電費入面，收取部份做附加電費，類似我哋嘅污者自負。此舉在香港看似理所當然，但在計劃經濟嘅內地卻較罕見，唔係反映政府加大力度支持新能源發展，而係可能資金投入上開始入不敷支，因為新能源領域甚廣，除太陽能，仲有風電、生物燃油、水電等，目前賺錢嘅只有太陽能，但仍難避免越嚟越多人進入市場嘅產能過剩問題。有內地證券行計過，過去兩年政府喺電費內撥出發展新能源嘅資金，分別 60億至 70億元人民幣（下同），金額雖然唔細，但要配合國策喺 2020年將再生能源發電量提升至佔整體 15%，抽燃油附加稅係較可行嘅選擇，以去年汽油、柴油銷量近兩億噸計，即使抽一蚊雞稅唔多覺，但就可以創造 2000億元發展基金，亦不致太影響民生。

炒成品油加價慎防中伏
發改委喺汽油度積極抽水，但對改善油公司毛利嘅成品油加價問題卻嘆慢板。若按成品油可加可減新規定，過去 22個工作日平均油價變幅超過 4%就可啟動機制，即係話近期油價回升上每桶 80美元，內地成品油亦好應該喺呢幾日加價。對上一次調價係 9月尾，當時少少哋每噸減 190元，若今次真係加，應該要加番 400元，牌價則每公升加 0.3元。不過若果過多兩日開始炒作加價，投資者就要小心，因為上次話根據機制冇落實調整日期，隔咗幾日至突然嚟料，玩死唔少短炒中石化（ 386）嘅人。中石化可以話係成品油機制下的犧牲品，加埋上個月減油價，令佢煉油業務由 8月開始一直虧損。成品油加慢減快，又規定喺國際油價升破 80美元時要開始扣減加工利潤率，直至按加工「零」利潤來計成品油價，實在非常「屈機」。好彩中石化管理層醒目，大做油氣開採同化工品業務，先至幫補到部份家計，對投資者總算有交代。胡孟青