陸羽仁 - 招股期過無人頂？

港股昨日在期指結算前夕，表演一下高台跳水，昨日外圍情況唔算差，恒指小幅低開165點，然後在頭20分鐘反彈上22149點高位，引班散戶追貨，跟住就插，在地產股和內銀股拖累下，在40分鐘跳水近350點至21800點才喘定。午後內地A股反彈，恒指跟住彈，跌幅曾收窄至下跌232點，但上衝乏力，再度下跌至接近全日最低位收市，失守10天移動平均線。

恒指繼上日大跌420點後，昨日再挫408點或1.9%，收報21762點，期指收報216 89點，跌502點，比現貨低水73點，成交83758張。國企指數表現更弱，失守13000 點關口，以及10天移動平均線，收報12831點，大跌314點或2.4%。大市成交縮減至690億元。

重磅股控(005)及中移動(941)隨大市偏軟，但跌幅相對較細，跑贏大市。

臨近結算先來插

金管局收緊價值逾2000萬元豪宅按揭成數，地產股繼續成為跌市之星，證券商紛紛調低地產股評級，野村證券將本港地產股評級降至「中性」，以反映新措施對正在復甦的物業市場用藥太重，後市政策風險正在增加。同時將長實(001)、新地( 016)、信置(083)、恒隆地產(101)、嘉里建設(683)及美聯(1200)評級降至「中性」；恒地(012)及新世界發展(017)評級更降至「減持」。本地地產股昨日無運行，地產股除港鐵(066)無起跌及收租股九倉(004)逆市升1.1%外，其餘全線下跌，恒指地產分類指數下跌2.2%，再度成為拖累大市向下的主要元兇，其中新世界發展及信置跌逾4.3%。

有中環茶友係陰謀論者，話昨日之跌就真係無端端愈跌愈多，有可疑，因為上日美股無乜點跌，日股叫做跌多少少，但港股在早上跌得快過日股，直情有反過來影響日股的味道，而阿爺股市亦無大跌，但港股早上係咁一棍插350點，下晝等3點內地收市後又從下午高位插240點，期指插到低水73點，好似驚你唔死咁。

茶友提供兩大陰謀解釋，第一係期指今日結算，兩日插800幾點，恐怕大戶呢個月都係開淡倉。第二係新股恒大(3333)昨日中午截飛，散戶借孖展認購早一日已截，呢兩個星期有四隻內地內房股一齊招股，集資額合共超過200億，在咁大利益在後頭，自然有人出來托市等散戶放心入場，到昨日早上大局已定，四大新股已經埋單，有心人係咁意放軟手腳唔托，個市游自由式都可以跌幾百點啦，更何放大戶明知自己唔托個市會回，時近月尾期指結算，自然會順手沽期指，搵番三茶兩飯，所以才會無情情插得咁急。

今期七隻新股齊發，結果四大內房股有一隻翻埋車，周二截止認購的商廈發展商卓越置業(1028)宣佈擱置上市計劃，消息話卓越俾公眾認購的公開發售部份不足額，供專業投資者認購的國際配售部份，雖然獲足額認購，但大部份投資者要求下限定價，公司管理層不願降價出售，故決定擱置上市，成為今年第一家招緊股時擱置上市的公司。卓越由瑞銀和大摩保薦上市，都算有大後台，原定集資額63至78億，集資額好大，結果去唔到觸礁。

卓越上市翻晒車

另一隻同是在本周二截止認購的明發集團(846)一樣係內房股，結果公開發售部份只獲一半認購額，但其國際配售部份已經獲足額認購，且無意減價，將會如期上市，不過咁上法股價有壓力，而且公開發售部份得一半額認購，你認幾多佢分幾多，散戶如果借孖展入大飛去認購，隨時分得比想像多好多的股票，萬一跌破招股價就真係抹晒汗。

聞說上周五截飛的另一隻內房股禹洲地產(1628)國際配售亦僅僅超額，公開發售亦只獲超額1.8倍，即係平均認兩股派一股，散戶都接到成手貨，公司擬以招股價範圍下限2.7元定價，集資16.2億元，下周一(11月2日)掛牌。

昨日截飛的恒大地產係今次上市四隻內房股中反應最好的一隻，佢去年上市觸礁，今次有備而來，由於有新世界彤叔等一眾富豪撐場，初步估計其公開發售部份起碼超購40倍，已經算好好反應。

另外匯市亦風起雲湧，美元大反彈，至昨日黃昏，澳元單日跌了1.5%，跌到0.

90美仙邊位，匯市咁大浪，恐怕股市亦有波濤。