陸羽仁 - 退市衝擊仲要捱

港股連續第五日下跌，恒指累積跌幅超過1500點。內地A股先升後跌，午後跌幅顯著擴大，收市創下了近三個月低位。恒指受中資股，尤其係金融股大幅下滑拖累，稍為低開之後逐級下挫，愈跌愈有，午後最低跌至挨近20050點才見支持，險守20000點大關，尾市跌幅稍為收窄，但仍跌近500點。

恒指收報20109點，勁跌489點，期指收報20093點，跌502點，比現貨低水16點。國企指數跌勢更急勁，收報11410點，大跌448點，大市交投暢旺，成交774億元。

中國要求多家銀行暫停放貸，全球投資者腳仔為之一軟，亞太地區股市昨日可以用小跌市來形容。上證綜指挫2.4%、日經跌1.8%、韓國挫2.3%、新加坡跌2.5%；台灣表現最差，台灣加權指數大跌3.5%；澳洲股市跌幅最細，微跌0.6%。

昨日港股跌兩浸，開市先跌美股反彈不夠多，因為前日港股交易時段美股杜指期貨升100點以上，港股大幅彈高，結果只升24點，所以港股就要跌番轉頭，而第二轉跌就係跟內地市跌。


愈插愈深風險累積

昨日各類股份幾乎全線下跌，內銀、保險股繼續重創，國壽(2628)下滑4%、平保(2318)、太保(2601)下滑5%；建行(939)、工行(1398)、中行(3988)、交行(3328 )及招行(3968)齊齊跪低跌3%。其他相對強勢股份如內需、藥業股都開始失守下挫，行情可以話一片淡風。

經紀張打電話來，牙痛咁聲，話佢在21000幾點買內銀股、內房股短炒，話個市無理由跌咁多，佢仲話要買番溝溝貨咁講。

我就叫佢小心，股市的一切走勢，都寫在行情之中，唔到你唔信。以走勢而論，個市跌咁多，本來要反彈，最好係反彈到21000點，並企穩其上，就有初步回穩之勢。但港股反彈無力，本周一彈到20619點就行人止步，昨日高位只是20560點，根本走唔上21000點，但向下就有力，昨日20000點都差少少穿埋，愈插愈深，風險在累積中，小心後邊還有一棍。

我同經紀張講，佢炒股炒幾十年都唔化，股市唔係上就係落，唔好死牛一便頸估佢一定要上或落，炒股講順勢，短炒博佢反彈無彈，到止蝕位要斷臂走人，唔係加注溝淡，否則咪愈賭愈大？

佢問我長內銀股、內房股唔得咩？我叫佢唔好咁天真啦，短炒變長，智者不為。至於真係長線投資者，而家咁時局，要明白在內地收緊銀根這種退市衝擊下，內銀股、內房股可能仲有一輪沽壓，手上貨多或抵唔住跌市者，都唔好太心急入市買呢兩種股票。高盛等大行唱淡後，內銀股的投資行情短期內變酸，唔想捱價又想買貨者，分段低吸H股指數基金相對穩陣。睇過早前高盛唱淡騰訊(700)後其跌幅之慘烈，記憶猶新。我有個老友話佢唔怕跌，反正錢放在銀行無用，不如分段買工行、建行收息，佢咁講已經預有風險又另計。


大部份銀行暫停貸款

昨日內地股市之跌，主要是和傳聞工行和中行等借貸較多的銀行，要再調高存款準備金率0.5厘。截至1月19日(上周二)，內地銀行業全部新增貸款達到1.45萬億人民幣，比12月的新增貸款3700億大幅上升，距離去年同期的1.62萬億，極為接近，令監管部門對超速增長的信貸急煞車，要求各銀行壓低新增信貸額。從上星期開始，監管部門為了準確掌握銀行信貸走勢，要求銀行日日報數。

瑞信亞洲首席經濟學家陶冬表示曾致電七家大銀行查詢有關暫停放貸一事，結果證實有六家銀行表示真有其事。

總的來說，內地唔係無貸款，只係唔俾貸得過多，但市場有擔心，短期內又難免會影響氣氛，令股市反覆尋底。