陸羽仁 - 獅王主帥跌市回歸

港股連跌幾日後，昨日朝早輕微反彈，恒指高開77點，之後反覆向上，最高升過165點，但區內股市跌勢未止，內地A股午後再度由升轉跌，上證綜指3000 點得而復失，恒指受累從高位逐步向下，午後更一度跌穿20000點關口，尾市跌幅收窄，重上20000點。

恒指連續第六日下跌，收報20033點，跌76點或0.4%，再創四個多月收市新低。國企指數跌勢更急勁，收報11373點，挫37點或0.3%，大市成交輕微縮減至732億元。

變咗逢高減持

港股和美股近日有點類似，跌得大力，彈得細力。美股交易員話，美股上星期五破位而下，芬佬和交易員本來跟大趨勢向好炒，但升市的上升趨勢破壞後，交易員有少少無所適從，變咗動向(momentum)追隨者，但?家美股的動向亦唔係太靚仔，所以交易員由以前逢低吸納，變咗逢高減持，頂多係炒吓上落。

滙豐證券就發表研究報告，話港股近期大幅調整後，恒指已呈現超賣，預期指數將考驗200天平均線(約19,999點)，短期支持位在19,900點至20,000點，估計短期有反彈機會咁話。

講起滙控(005)，昨日係佢大日子，集團主帥紀勤回歸香港辦公，滙控職員在總部地下高調歡迎，和當年低調離開是兩回事。記得滙控在92年遷冊倫敦，鬼佬大班搬走晒，18年後，行政總裁辦公室終於搬回香港，唔係香港得，只係因為中國得。

紀勤因為回港一事，早前還和英國記者火併，天空電視記者蘭度爾(JeffRanda ll)訪問紀勤，問他為何掌管英國最大公司，卻把他的辦公室搬到香港。紀勤回應謂：「因為西方正在東進，滙控的最大業務在亞洲市場，總裁到業務發展最快的地區辦公，合情合理」。蘭度爾火辣追問：「批評者將會認為滙豐在90年代初香港回歸前途不明朗時，將總部遷冊到倫敦，倫敦當時給滙豐提供了穩定的基地，如今英國時勢艱難，你卻選擇一走了之？」紀勤駁斥蘭度爾話：「在1992年實際的情況是這樣，我們收購了英國米特蘭銀行，當時應英倫銀行的審批條件，我們必須把總部搬到倫敦。如今倫敦目前只是全球衆多金融中心之一，我想你已經看到，上海、香港、新加坡都正隨着整個地區的發展而高速擴張。」

俄鋁上市即插

做生意的人應該好現實，當年滙豐怕香港陸沉令佢翻艇，所以放洋避一避，如今這個地區生意多，所以較正船舵回歸。加上滙控申請緊到上海上市，唔叫啲大班回港坐鎮，好似都唔係幾畀面阿爺。滙豐大班都識揀時間，揀中港股下跌的時機回來，其實相當好，滙豐呢一排由去年11月的高位98.25元，回落到昨日的 84.05元，回落咗14%，將來紀勤就以84.05元的價錢起步，又睇吓兩三年後滙控會唔會好番好多，起步點愈低，將來就愈容易有成績也。

全球最大的鋁生產商俄鋁聯合(486)昨日首日掛牌，佢唔好彩遇上近排跌市，收報9.66元，較招股價10.8元低10.6%。每手24000股，即蝕 27475元。俄鋁日前公佈配發結果，俄鋁是次招股共有229名投資者或機構獲配發股份，首5名獲分配最多股份的投資者已佔是次發行股份近一半，即係話大戶揸咗一半貨，貨源較集中。證監會經過雷曼迷債一役後，唔敢掉以輕心，見俄鋁盤數唔係咁靚，就搞到佢每手股數20幾萬，等散戶好難買，結果益咗散戶，無得買就唔使輸啦！

hightea@hkheadline.com