陸羽仁 - 華爾街開戰

股市永遠充滿意外，美國總統奧巴馬宣佈大力限制美國銀行業的風險投資，就不是市場能預估到意外事件，而且呢件事對美國銀行業係動筋傷骨的大事，影響深遠，令投資者不得不重新評估投資部署。

上周五美股壞消息頻傳，杜指再大跌216點，跌到10172點，美股連續跌穿1050 0點和10300點兩個大支位。除了奧巴馬的管制銀行業方案外，市場又流傳中國會加息，又因為有兩個民主黨參議員話唔支持伯南克出任聯儲局主席，令人擔心佢做唔成主席等等，不過我認為真正困擾市場的還是奧巴馬的監管方案。





美股再插216點

奧巴馬係在前聯儲局主席保羅·沃爾克(PaulVolcker)支持下提出限制銀行業的計劃，沃爾克而家82歲，係格林斯潘前一任的聯儲局主席，在美國金融界德高望重，所以唔可以話奧巴馬唔識嘢先至提出這種方案，偏偏就因為沃爾克太了解美國銀行業的運作，所以建議打到銀行界的核心地帶裏去。

奧巴馬在宣佈方案時，話到明要向銀行業宣戰：「當我看到某些反對改革的金融機構重返老一套(的冒險行為)時，我改革金融體系的決心只會更加強烈。如果他們想要一場戰爭，我已經準備好了！」奧巴馬建議的重點是限制銀行的坐盤交易(Proprietarytrad- ing)，即係話銀行幫客戶投資就得，自己坐盤長期投資就唔得(奧巴馬話並唔禁止短炒)。其他相關限制包括禁止銀行投資對沖基金和私募基金。又限制單一銀行佔存款市場不能超過10%。總的精神係限制銀行冒險投資，以免再出現危機，要美國政府用納稅人的錢去拯救。

美國著名銀行業女分析員MeredithWhitney話，佢「打賭奧巴馬方案會通過，這對銀行和消費者都不是好事……奧巴馬建議的中期影響是令流通資金減少，不止商業市場會減少資金，消費市場都會減少資金。」

奧巴馬打散大銀行

股市反應由唔信奧巴馬可以推得郁銀行業改革方案，變為要衡量若方案通過的影響，好多對沖基金開始部署新制度出現後股市的炒法。1929年美國大蕭條後，當時歸咎股市狂升暴跌，皆因銀行家的貪婪，後來通過Glass-Steagall法案，強迫銀行和證券行拆散經營，當時銀行業巨頭摩根銀行被逼拆骨。如今奧巴馬的改革法案雖然不如當年的Glass-Steagall法案咁厲害，但對沖基金經理都開始估計，最大的幾家銀行在未來幾年可能變細，它們會被逼出售部份業務，減少規模，即係令它們不再有「大到不能倒」的體積。

奧巴馬方案等如向華爾街開戰，華爾街所在地紐約市市長彭博大動肝火，話若奧巴馬的方案通過，華爾街收入大減，連帶紐約的收入都會大受影響，令紐約要大量裁員。彭博好唔順執政民主黨針對金融業的政策取向，佢回應有建議話要將銀行家的花紅凍結託管的做法，話「不如我哋將眾議院議員的人工託管10年，睇吓佢哋通過的法案得唔得，得先至發番啲人工畀佢哋啦。」出現如今局面，銀行家和奧巴馬都要各打五十大板。銀行家衰在貪(不過唔貪為乜去做銀行家？)佢哋在金融海嘯時獲得美國政府救助，去年個市在3月後V形反彈，銀行炒作都賺大錢，所以大部份急急還番錢俾政府，然後話政府你唔好管我派花紅，好多家行都大派高花紅，有些仲係歷史上創紀錄的花紅，真情當金融海嘯無發生過。

另一方面，奧巴馬政府衰在廢，除了延續上任布殊政府的救市措施外，無乜嘢做得到，美國經濟復甦步伐緩慢，失業率靠近10%的高水平，有少少等運到的格局。奧巴馬的民望，由上任時接近70%，跌到而家接近50%，唔見咗近20個百分點。最近麻省參議員補選，俾個共和黨派個男模特兒選咗出來，民主黨失去了全面控制參議院的優勢，執政黨提出醫療改革法案都唔知過唔過得到，奧巴馬的心急可想而見，因為今年11月就係國會改選，若奧巴馬支持率再急跌，國會選舉失利，民主黨失去了國會的多數議席，往後就只能做跛腳政府。

民望下跌插賓卡

奧巴馬急急出招，唔係搞好經濟，而係搵銀行家做經濟唔好的替罪羊，明知美國人唔喜歡銀行家攞高花紅，就搵佢地開刀，踩低銀行家，以提振自己的民望。這種局面相當危險，因為奧巴馬唔係單以經濟理由決定經濟政策，唔係單考慮金融風險而提出改革，決策時混雜了政治考慮。由於銀行家在美國財雄勢大，佢哋亦唔會坐以待斃，一定會和奧巴馬戰鬥到底，鬥法過程中，股市難免大波動了。

早排我話港股有兩大引擎：美股和內地股市，兩個引擎都好好，港股一有水到就會生番；但奧巴馬出招後形勢立變，而家睇嚟，大陸雖然話收番緊啲銀根，但基調良好，內地股市唔似有大問題，不過美國呢個引擎突然出了點問題，唔係一時三刻可以當無事再炒過。

內地消息有好有壞

有外資大行中人話，美國經濟其實未得，但股市行先經濟半年，所以走勢好好，但呢次奧巴馬使出懲罰銀行的政策，對投資者的心理打擊好大，華盛頓向華爾街開戰，會令股市走勢非常波動，可能會觸發更深的調整。

從技術走勢而言，杜指跌穿10340點，而且係大幅插穿，跌得咁急短期或有反彈，但整個走勢是調整的趨勢。現在美股從高位調整了5%，若較深的調整，跌到8% 以上不出奇，所以短炒者要小心美股未跌完，短炒要守止蝕。

睇番港股，升時跟唔到美股升，但跌時亦未必有好大抗跌力，除非內地股市再現強勢。

中國銀行(3988)部署大集資，中行公佈董事會通過決議，包括尋求股東批准一般性授權，發行A、H股各兩成新股，同時將在A股市場發行可換股債總額不超過四百億元人民幣，若中行全額行使所有授權，集資總額高達二千億元，估計中行部署集資的消息對內銀股股價有壓力。