青心直說：分好板塊等能源政策出台

國家新能源佈局升呢，總理溫家寶出任能源委員會主任，係國務院直屬機構，反映新能源規劃已入最後直路。昨日喺 A股上市嘅中國西電，竟然跌穿招股價，認真唔畀面。講開西電，冇得買都要識吓，佢係連接中國「西電東送」同「三峽工程」嘅骨幹，同樣係國務院國資委直屬國企，係內地最大的高壓輸配電設備生產商。市況唔就，市場低估咗呢次能源決策機構升呢嘅利好作用。因為自從 1993年撤銷能源工業部後，一直未有統一上下政策嘅能源管理部門，引致供求嚴重失衡，例如煤價可加、電價冇得加、成品油定價機制改咗等於冇改、新能源一窩蜂炒到產能過剩。冇協調係因為能源管理嘅職能分散至多個部門，各自為政。
吼設備股冇走雞

溫家寶呢次膽拖副總理李克強，高調掌管未來能源政策，預料會有大動作去統戰全國能源發展，投資者要非常留意，風向到底有冇轉變。未等到總理出手，我哋梗要兩手準備，將板塊內優質股寫好記住，見邊個板塊開始異動，往往就係利好政策出場之時。新能源不外乎係核電、風電同太陽能呢 3瓣。核電發展目標係到 2020年將核電裝機容量提升至 8000萬千瓦，佔總用電量 7%，投資規模 9000億元人民幣，未來 5年要建 9至 10座新核電站。核電股概念早前有分析過嘅中核國際（ 2302）同有中廣核撐腰嘅銀建國際（ 171）。風電發展都拍得住核電，預計去年新裝機容量已有 1000萬千瓦，代表作有龍源電力（ 916）。太陽能政策仍較為搖擺不定，炒味較濃。搞乜電都好，總要有中國高精密（ 591）嘅電錶，亦唔少得上海電氣（ 2727）、哈爾濱動力（ 1133）、東方電氣（ 1072）等設備股。以上並非推介，只係幫大家分類，唔好再問邊隻買唔買得。胡孟青