青心直說：闢「自郵」商道攻內地零售市場

80後嘅年輕人熱心參與政事，關心社會，且不談政見是否過激，已充份體現香港自由之風。 80後熱情澎湃，潮語滿天飛，最新潮流莫過於晚晚返屋企「淘嘢」，即係上淘寶網搜羅平靚正嘢，因為上淘寶網最少平一半，運到落嚟再當進口貨喺本地網站賣，可賺一倍利潤。唔係想促銷與淘寶同一個老竇嘅阿里巴巴（ 1688），而係想講呢個已成為香港年輕一族嘅新消費模式，做零售生意要把握潮流，唔好等到冇晒生意先諗轉型。換轉角度，港人喺淘寶大展拳腳就比較難，除非閣下喺東莞有間廠，否則都幾難同人鬥平；二來網上生意唔好以為無本生利，要請人喺網上同客戶溝通，即時解答問題。不過香港都唔係冇得做，因為港商喺內地人心目中，誠信同產品質素有保證，就好似我哋對「 Made In Japan」嘅執着，要食盡高質素真貨呢條水，至有機會打入內地網上世界。現時網上未有淘寶咁成功嘅專業 B2B網站，不過中國郵政旗下嘅中郵電貿（ 8041）將係明日之星，潛力不容忽視。

廣東郵政送貨代收錢
中郵電貿前身係大陶精密，去年初收購廣東郵政附屬信源傳媒，現持有 20%。公司 7月以先舊後新方式配售最多 1.06億股，配售價每股 0.38元，之後股價就被洗到落 0.24元先止瀉，現價仍較配售價低得多。佢最大賣點係可以幫香港商家，透過中國郵政喺廣州嘅網絡賣貨，郵政局除咗送貨，仲幫手收埋錢。現時中國郵政積極發展網上商店，最好賣係過節禮品、食品同鮮花，有內需概念。呢個「自郵商道」計劃開始冇耐，透過廣東省 2600間郵局力谷，日本奶粉、奇華禮餅等都好好賣，每宗交易中國郵政約收 3%交易費，速遞費平香港四五成，下一步擴展至上海、北京同天津。新生意有概念，初步成績唔錯，最大優點係拍住中國郵政，攞個人資料地址發廣告冇難度，有佢哋照顧埋錢銀交收，將成他日中港兩地營商新趨勢。胡孟青