陸羽仁 - 兩萬大關仲未守穩

美國總統奧巴馬香港時間周三晚發表上任後的首份國情咨文，話「為了扭轉經濟崩潰，政府必須出手」，提出多項包括減稅嘅刺激經濟措施。亞太區股市普遍反彈，內地股市反覆靠穩。昨日系期指結算日，港股連跌六日之後，昨日終於有番啲似樣嘅反彈，恒指收報20356點，升323點，期指收報20347點，升 370點，比現貨低水9點。國指大幅反彈263點2.3%，收報11636點，大市成交縮減至660億元。

內銀股系昨日升市嘅火車頭。恒指金融分類指數升2%，恒生中國H股金融行業指數漲2.7%。其中建行(939)、工行(1398)及中行(3988)齊漲逾3%；招行(3968)及信行(998)升逾4%。保險股國壽(2628)升0.9%，平保(2318)升1.4%，財險(2328)漲2 %。

公司業績偏向靚仔

本地金融股升勢就較為溫和，美國維持利率不變，滙豐銀行亦宣佈，最優惠利率將維持5%不變。港元儲蓄存款戶口的利率亦維持不變。本地銀行股普遍持平，滙控(005)昨收報85.05元，升1.2%、渣打(2888)升2%、中銀(2388)漲2.5%。

港股跌到去兩萬點邊緣，是否找到支持呢？暫時仲系言之尚早，大市兩萬點的支持，主要系心理關口，第一次守住，未能話系轉危為安，相信仲有機會再試試支持。

最近個市系兩萬點樓上，一直系咁插落嚟，好似全部都系壞消息，咁究竟系咪真系全無好消息呢？睇真其實唔系，好似昨日恒隆地產(101)宣佈業績，扣除估值後，盈利錄得五十幾億元，系曆年最高水平，主要系香港賣咗四百幾個豪宅入帳，另外內地租金逐步上升，系內公司股份昨日就趁住好消息反彈。

未炒先謝好少見

中環茶友話，本來他估計一○年大市會先升後跌，至少炒到第一季，之後好業績公佈，大戶趁機沽貨，個市先開始謝，但現在未到好消息出現，個市已由高位跌落嚟，差不多調整近10%，似乎唔系咁似大戶炒股策略，點解會咁？一個解釋系新年頭，內地管理層眼見信貸膨脹太快，經濟急促升溫，搞到有泡沫危險，於是急急閂水喉，結果不但散戶失預算，連大戶都出乎意外，要急急調整策略，系市場猛咁沽貨，結果未等到食胡已經推牌。

大戶炒股，有自己一套策略，同時都會順勢而行，茶友話，內地調整勢頭咁急，大戶無可能繼續夾個市上去，不如索性先行做淡，不過，上市公司業績普遍唔差，當二、三月份陸續宣佈後，大市平均市盈率就會降低，屆時大戶會唔會炒翻一輪業績，現在不妨存記。

大市近日不穩定，暫時未明顯影響公司招股狀況，限用介紹形式上市的俄鋁(4 86)生不逢時，首日上市破底，昨日股價續跌0.41%。不過，俄鋁系另類概念，散戶無法公開認購，故此表現乏力對氣氛無大衝擊。跟住中國領先的井下長壁煤炭開采設備的設計商及製造商國際煤機(1683)公佈上市詳情，公司計劃發行5.2億股新股，招股價介乎4.88至6.38元，集資最多33.18億元，煤機之前，另一隻生產采煤機械的三一重裝(631)上市，表現相當突出，系同類股份開路下，且看煤機能否淡市突圍。