青心直說：發盈喜、價回調入得過

同投資銀行朋友食飯，話題離不開大市走勢，友人是大淡友，擔心裂口底部 20800上唔翻，一定落去 19400試底，若然失守埋，玩吓手落 16000咁話。聽落難以置信，但基金大舉沽貨，高盛又早喺去年底摺埋隻對冲基金，似收到風奧巴馬會有 Volcker Rule呢招。美國打大鱷，英國好有機會跟風，投行界頓時腥風血雨，歐美兩地高級 Banker都想過嚟亞洲搵食，一來稅平，二來可逃避針對銀行家嘅重稅。唔知滙豐大班又係咪因為咁轉嚟香港返工？短線關鍵，要睇奧巴馬打擊坐盤交易嘅決心有幾大，會否明修棧道，暗渡陳倉，純係想安撫吓納稅人，否則大行一旦玩抽資，特別係基金愛股被洗，對市場影響可以好大。
中航科工商機大

3個月前，同大家講過中航科工（ 2357）嘅好媽媽概念，當時股價仲係兩個幾，近日衝高後回調，正係上次「睇完當買咗」嘅投資者入貨機會。公司發盈喜，受業務重組刺激， 09年度將由虧轉盈。 08年整體仍蝕 11.57億元（人民幣．下同），即單靠賣晒「有毒」嘅汽車業務畀阿媽，財務已大幅改善。仲有旗下嘅中航電子同樣扭虧， 08年度淨虧損 4.25億元，即係話一年間起碼賺 4億幾。唔太了解中航科工嘅朋友，再重溫吓佢嘅重組故事。好媽媽中國航空工業集團，將深圳上市嘅中航光電 43%股權注入，換取中航科工旗下東安動力控股權，而東安動力就係上述所講嘅「毒資產」。重組後公司業績即時轉盈，可見中航光電提供唔少盈利貢獻。中航光電唔係太陽能股，而係內地最大連接器（ Connector）生產商，即係類似插蘇、寬頻線之類，連神舟 6號同軍方都係用佢，充份發揮航天軍工概念。母公司管理層早前表示會進一步注資，預計未來 3至 5年內將旗下高達 1500億元嘅航空業務資產注入中航科工，作為母公司整體上市旗艦，中國地大物博，航天設備已不限於軍用及警方專用系列，內地有錢人多，對民用飛機及直升機需求增加，商機難以估計。胡孟青