青心直說：大跌市炒股有方

一個大浪打散全球股市，冇着泳衣嘅醜死鬼現晒形，大戶派貨派到手軟，基金愛股即使食正國策如濰柴動力（ 2338），都照樣被洗，加上淡友大手出擊，連 H股 ETF都要大做沽空，大價股撈底肯定係淆底收場。既然基金計數，虎年未到已四出食人，保留實力短炒細價股，條數有得計。早前分析過多隻較少人識嘅股份，如中國高精密（ 591）、勝利管道（ 1080）、文化中國傳播（ 1060），甚至創業板股中郵電貿（ 8041），全部衝高過畀足位獲利，炒細價股就係要咁眼明手快。呢個世界冇嘢係實賺，要跟炒細價股，心理上就要有輸晒算數嘅風險，有效控制注碼，股價唔行、唔對路記得要止蝕，唔好話︰「青姐叫買喎」，輸錢賴地硬。

短炒細價股值博
今日講一隻早喺佢仲喺創業板時已分析過嘅弘海（ 065），去年轉主板。簡單講佢除咗係炒股之外，亦係有錢賺嘅股份， 09年上半年扣除一次性開支，經營溢利仍升 11%至 2310萬元。股份市值約 5億元，業務簡單到不得了， 28%收益來自賣煤、 72%來自塑料編織袋。未搞呢兩瓣前，弘海係做交通運輸技術解決方案，連年虧損，轉型後有錢賺，已成為吉林最大膠袋廠，產品主要用於盛載農產品及化肥，主要客戶均來自吉林呢個農業大省。睇最新業績，來自呢方面收益明顯減少，取而代之嘅係內蒙嘅兩塊煤田。 07年佢轉型用 1億元買煤田時，大家半信半疑，結果時間證明一切，去年上半年收益增至近 5000萬元。好戲在後頭，家用緊嘅露天煤礦，主要出產褐煤，平均發熱量每千克 3100大卡，遠較中國神華（ 1088）甚至將上市嘅南戈壁（ 1878）低。不過，另一個發熱量 5300大卡嘅地下煤礦正式投產，儲量有 2.2億噸，年產量可達 240萬噸，有助填補吉林同遼寧每年逾 9500萬噸供應缺口。 08年每股盈利 0.1203元，保守估佢 09年賺多一成， PE都唔過 10倍，基金即使洗倉應有大把人接貨。胡孟青