青心直說：「股」靈精怪逐個捉

個大市雖然悶，但係唔少半新股就日日飽嚐天堂與地獄嘅滋味，今年香港有望冧莊再成全球新股上市集資王。

農業銀行（1288）成功上市，就算減咗價，仍然足以養起唔少行內人，只係交易所真係有必要認真關注一下上市公司質素，唔單止係介紹上市嗰批有唔少大蠱惑博大霧搞到甩甩漏漏，近期更有唔少未夠秤嘅半新股，陸續因業績走樣發盈警。證監會都忍無可忍，狠批新股保薦人盡職審查工作未達標準。

作為市場把關嘅監管機構，證監會雖擁有最終否決權，上市委員會審批時仍是責無旁貸，還記得歐亞農業事件，03年5月港交所與證監會曾就監管上市保薦人作諮詢，當時曾有建議要上市保薦人在招股文件上簽字畫押，一旦上市公司出事，保薦人隨時要上身；然而於04年6月作總結時，卻只係需要保薦人與香港交易所（388）協議承諾確認要做好盡職審查就夠。05年6月再作諮詢時，更有人倡議要為保薦人購買專業彌償保險，仲要搞扣分制，結果不了了之。總之一旦要拉要鎖要監管，最大嘅反對聲音肯定係來自保薦人尤其一眾外資大行，因為佢地搞得IPO嘅都唔係嘢少，然而最容易出事嘅反而應該係細間嘅投行保薦人。

證監會招兵買馬

保薦人急於求成搵銀，上市公司招股書財務內容嚴重失實，令人有理由相信假如唔係搞上市班友仔經驗不足，好可能係助紂為虐博搵快錢，唔顧小股東投資者感受。

聞說近期證監會正積極招兵買馬，好明顯係開咗好多「快勞」隨時逐個捉，年中咁多上市公司與行家踩鋼線，唔該自己小心睇路！證監會仲行緊舊制，做夠3年就可以取回公積金，唔使等到65歲。事實上，擁有證監會工作經驗，除咗等於通過咗人格上嘅盡職審查，更可省靚埋自己張履歷表。

胡孟青

作者為獨立股評人