青心直說：農行上演終極貨源歸邊

內地股市7連陽，農業銀行（1288）H股上市亦剛好7日，計埋人仔因素仍較H股有折讓嘅農行A股，卻要逆市而跌1分錢人仔，同時H股仍然表現硬淨兼有兩格進賬。表現如此迥異，應歸功於外資大行及基金出手入市力挺。

H 股上周五單日取得上市一星期即神奇勁升5.45%，獲得上市一周最大單日升幅。農行今次上市公開發售部份只佔H股發行總數5%即12.7億股，按每股 3.2元定價，要控制散戶手上貨源，假設國際配售嗰批貨生生性性，40億鬆啲就夠。先要營造冇得升嘅煙幕效果，要騰雞而又冇乜信心嘅散戶盡快就範。就在上周四通報天下，美資大戶美國資本集團旗下資本研究和管理公司在掛牌當日斥資126.56億港元入股農行39.3億股H股不在話下；H股上市保薦人之一摩根大通亦表示同日以每股平均價3.28港元買入約48.25億股H股，涉資更達158億港元；另一主要包銷商摩根士丹利亦在掛牌翌日以每股平均價3.217 元增持約1.05億股H股，涉資3.2億港元，大摩好倉權益即由原來15.28%升至16.31%。

4大外資行控6成貨源

根據港交所最新股權披露資料顯示，農行H股大股東名單上摩通、大摩、德意志、CRM，4大外資行持H股總比例已高達62.84%，農行H股的貨源高度集中在大戶手中。

即使加埋15%超額配售，農行H股發行股數292億股，其中由基石投資者持有、尚在禁售期嘅133.37億股，佔H股總股數45%。可以咁形容，農行H股已盡入強者之手，上演一齣「貨源歸邊」終極版好戲，還原基本，都係玩供求效應，根本就無新意。只要後市冇乜事，成功保住發行價，包銷商居功至偉，呢類「大刁」，隨時唔只出力仲要出埋私房錢頂住個價，真係少啲資本都冇運行，所以只有大行才有資本做「大刁」。

胡孟青

作者為獨立股評人