青心直說：只要最好不要最貴

山頂地王開拍在即，一手市場氣氛熾熱，連一向較大型屋苑慢熱嘅單幢盤亦動起來，美國10年期國債孳息跌穿3厘，就算最保守嘅資金都轉移至風險相若而回報較高、或者風險較高而回報明顯較可觀之投資目標，中國人壽（2628）5年期保證3.47%回報而且派緊5.5%息率嘅港元儲蓄保單，即使扣除保費成本，堪稱市場上最高，呢個就係點解連債王都要轉軚嘅原因。

美國有排低息，論回報香港買樓收租依然吸引，係就係貴咗好多，懂得擇肥而噬嘅仍可做到進可攻退可守。

英皇國際（163）旗下英皇地產北角渣華道98號單幢新盤，高樓底、戶戶露台加工作平台，甚至兩房單位都有套房，極之關心用家需要；發展商更加斥400萬打造智能家居系統，可以用iPhone或iPad控制室內燈光空調，呢點係市場上好多所謂豪宅盤都未能做到，而且海景有保證。發展商咁肯落本，擺明係省靚招牌之作，唔怪得連行家嘅高層都被吸引，爭相觀摩。

中港消費心態有異

噚晚遇見一位本身住在北角半山、手頭上已有多個太古城收租物業、今次又係真金白銀買咗一個低層777呎單位作投資嘅買家，由於呢位買家處事一向認真，買樓從未損手，還記得03年沙士時佢就連環掃入幾個賽西湖單位。傾開發現，佢已經購入咗首批推出之一個單位，10樓以下層數，即供呎價8100元，呢個價佢認為係進可攻退可守，尤其是明知眼見發展商每次加推都會加價，務求要營造所有買家都有錢賺、越早買越抵之印象。還有呢位買家最滿意就係可以睇到清水樓。

從呢位香港人買樓可以了解到香港人「只要最好的」與內地豪客「只要最貴的」消費心態之大不同。點解市場上唔係隻隻本地地產股都可以企於250日線之上，背後原因唔難理解。

胡孟青

獨立股評人