陸東：港股今季難破關明年前不加息股樓料齊鳴

【基金經理專訪】經過慘淡的上半年，港股7月略見起色反彈900點。昔日明星分析員、現任基金經理的陸東卻提醒，恒指今季可能維持在19000至22000點上落，等待業績期後企業盈利獲調升，以及市場意識到低息環境延伸至明年中，港股始能破位，一擁而上。

記者：黃武榮

Look's Asset Management董事總經理陸東接受本報專訪時解釋：「上半年甚至去到現時第三季，（港股）都仲係consolidate（鞏固）緊去年龐大嘅升幅，需要一段時間去消化……雖然話中國有宏調，但liquidity（流動性）無少到，只係心情有輕微影響，萬九至二萬二點，仲要維持一段較長時間。」

合理值27500年內可達

問到是否第四季突破，陸東指難以確定時間表，但卻斬釘截鐵指，下半年一定較上半年好，他預測今年恒指27500點的合理值，已經是非常保守的推測，有信心年底前可到。

「我計合理值有3個組成部份，最大變數係企業盈利，但撇除好多特殊收益及非核心盈利，最保守有超過18%增長，隨着恒隆地產（101）、港燈（006）派成績表，進入藍籌放榜高峯期，我相信企業盈利上半年會比預期好，之後分析員就會相繼調高下半年及明年盈利預測，成為突破催化劑。」

A股兩年內料升一倍

陸東續稱：「港股現時13、14倍PE（市盈率）唔算貴，企業盈利增長亦見改善，大市要發圍，唯一係要等人alert（警覺）到利息中長期仲係低企……而未來 12個月，即明年中之前，美國都無可能加息，中國更無可能喺美國加息前出手……今年個個話大陸加二、三次息，發神經，內地扣除食品價格，實際無通脹，現時全世界都無條件退市，講吓都死。」

相對A股，陸東更加樂觀，揚言經過早前調整後，基調更趨良好，A股似乎確認見底。「兩年內double（升一倍），（滬綜指）5000點絕對做到。」

供應少利息低樓價易升難跌

對於樓市，陸東坦言在供應少、利息低環境下，今年樓價只升不跌。「唔覺得本地樓價有下跌風險，我承認現時絕對唔平，仲幾貴吓，但樓市供應要到2013、2014年先正常化，而供樓利息又低，除非大陸要班資回朝、沽港樓套現，未來數年樓價易升難跌。」

問到現時是否仍是入市時機，陸東稱，要量力而為，「若是用家又負擔得起的話，仍可以入市，但就唔好炒樓。

他表示，買樓可以揀港島藍籌屋苑，保值能力及流通量較好，新樓較二手樓有三至四成溢價，唔太值得。」

值博率高

「買滙控不如買內銀」

滙控（005）今放榜，大行料大笨象上半年盈利可「翻一番」，陸東卻相信在可見將來，滙控及花旗等金融巨頭難有好表現，與其買滙控，不如買內銀股，值博率更高。

歐美狼狽內銀跑贏國際

陸東指監管機構對歐美銀行不友善，是滙控的致命傷。「滙控要限住leverage（槓桿比率）、會俾人限住派幾多花紅，喺綁手綁腳情況下，唔會做得好……滙豐現時係fair value，市賬率（PB）1.7、1.8倍亦合理，但新嘅經營環境下，無咁大自由，花紅要徵暴利稅，大機構以後吸引唔到叻人。」

另外，陸東指，在歐美最狼狽之際，內地金融體系積極重組，資本充足比率足夠、壞賬水平低，絕對會跑贏國際同業。「中長期而言，內銀股投資價值高好多，最重要係唔貴，十幾倍PE（市盈率），4%至5% yield（股息率），兩倍PB，直情係平啦。」

內銀股現時多達8隻，陸東坦言，仍鍾情招商銀行（3968）及建設銀行（939），亦建議不要「貪新厭舊」，「農業銀行（1288）上市後去到這些水平已經唔算平，相對建行，中國銀行（3988）有track record（歷史數據）睇，o依家當然要舊唔要新啦。」

出錢出力

辦陶瓷展助復康者

陸東半年前遷入中環新辦公室，甫踏入寫字樓，室內擺設並非慣常的古董油畫，而是製造精緻的陶瓷公仔及繪畫。仔細一問，原來陸東亦是陶瓷鑑賞愛好者，家中及辦公室擺設作品，皆來自聖雅各福群會旗下「陶藝工作室」的弱能人士製造。

「香港係富裕社會，但唔係個個咁好彩，有能力就應該回饋，佢哋所做嘅陶瓷，有細路仔嘅童真，有大人嘅魅力，做出嚟嘅藝術品好靚，有深度，值得欣賞。」

陸東補充，陶藝工作室是少數他出錢兼出力的慈善機構，平時有空就會到灣仔石水渠街「陶藝工作室」探訪成員。但他覺得復康人士不可能永遠活在一個隱蔽地方，陶瓷係一種好好溝通方法。因此，他親自向地產商叩門搵場，舉辦「泥造人．樂造人」（圖）陶藝展覽，展期今日起，一連16日在海港城展出超過20件陶瓷作品，每逢周六及周日，更會有陶藝成員示範。

陸東看股樓滙及經濟

－港股看27500－

下半年可見27500點，大市於萬九至二萬二點，要維持一段長時間

－A股兩年倍升－

兩年內可倍升至5000點，未來5至8年會繼續跑贏全世界

－股市兩風險－

（1）內地政策突然收緊：如不准銀行借貸，但相信機會不高

（2）歐洲債務危機深化，由小國擴散至德國法國等，惟現時未見歐元區有問題

－內銀內房俏－

‧鍾情內銀股（招行、建行），歐美巨頭如滙豐難有好表現

‧內房股投資價值較本港地產股高

‧懶人投資兼低度風險：盈富基金

－內地可保八－

通脹不會重臨，未來數年GDP增長不會少過8%

－人幣年升3%－

今年升3%，最多只是5%，有利出口企業轉型，由低增值過渡至高增值行業

－美雙底衰退－

有反彈無復蘇，會出現雙底衰退，但第二個底會好淺，因為利息太低