陸羽仁 - 循環又到向上時

近排好多散戶睇淡，窩輪市場就睇得好清楚，對上一個星期牛證和認購證合共有2.2億資金流出，熊證有3.7億資金流入，過去一星期恒指升了649點，即係造淡的散戶要輸錢，若果唔走就俾人咬住咗。

相反理論小心夾淡

這種散戶一面倒看淡的情況，潛藏殺機，若用相反理論，散戶睇淡，究竟邊個睇好？到底這批炒熊證的散戶最後個個賺大錢，還是會被夾埋牆角？散戶係抱「個市升得多會跌」的信念入市，個市升得多最後當然會跌，問題係去到乜位才跌、以及幾時跌，怕只怕是夾死晒啲造淡的散戶，令熊證到晒打靶位才回吐。

炒股份長中短線，極短線未必要睇公司盈利，炒兩三個月中線，都開始要睇番公司盈利前景，?家好多公司陸續公佈中期業績，呢份中期成績表係估計公司全年業績的重要參考。

今年上半年全球經濟初步復甦，而去年市場正值低迷期，所以市場本來已期望公司公佈今年上半年的業績好過去年，所以公司公佈的數字唔單要好，亦要核心業務增長得勁，才令人有信心公司下半年都有好表現。

睇公司的核心業務得唔得，主要睇銷售數字，尤其係「內生性增長」(organic growth)，所謂「內生性增長」，就係指公司並非通過兼併收購方式實現的銷售收入增長，內生性增長主要受銷售量和銷售價格影響。用通俗的語言去講，係指公司有無做多咗生意，而做多咗生意即係賣多啲嘢，或者賣貴啲，最好就係「價量齊升」。

航空股進入良性期

先睇國泰航空(293)，航空業和航運業係好典型的周期性行業，經濟好時，運輸需求上升，首先就係填滿飛機的運輸空檔，即係生意做到爆，公司開始賺大錢；繼而生意多到做唔切，正常會加價，咁就賺得更多；咁好生意，航空公司、航運公司都會投資買飛機買船提升運力，又有新經營者見咁好賺加入競爭，但造船造飛機需時，新運力供給會滯後一兩年，所以供應有樽頸，運費再升，行業賺錢達到高峰。

經濟有循環，到循環向下時，運輸需求大降，咁啱新供應終於大量出現，屋漏更兼連夜雨，運力大大過剩，公司蝕到阿媽都唔認得。跟住出現下一個周期，好多公司執笠，慢慢出現新的平衡。過去這些周期要10年、8年，?家經濟全球化，有時兩三年已是一個小循環，所以我哋睇航空股、航運股，主要睇佢哋是否已走出供過於求的循環底部。

國泰今年大豐收

國泰航空業績明顯有大翻身跡象，國泰今年中期純利68.4億元，是去年同期純利的8倍。更重要是國泰上半年仍錄得42億元營業溢利，與去年同期的2億港元虧損比較，溢利不止扭虧為盈，更大幅增長。今次國泰業務得以大幅改善，主要受惠於兩個極為重要的市場，就是頭等和商務客運，以及貨運的需求回升。航空公司最賺錢就係頭等和商務客運和做貨運生意，?家國泰就係升呢啲生意，係典型「內生性增長」。

國泰去年只得47億元純利，07年業績高峰時有70 億純利，國泰自己估下半年同樣好生意，按此推算全年營業溢利過80億唔出奇，加埋特殊收益有過100億純利，國泰今年好有機會出現近年未見的好業績。國泰由近期牛皮位16元急抽而上，上周五回吐2.2%，收18.52元，市值729億，以今年估計盈利計，仍然未貴。未來的風險主要是油價急升和環球經濟雙底衰退的風險，所以睇住油價，如果無大升，等國泰回吐時不妨買吓。

睇完航空睇航運，董伯伯家族的東方海外(316)上周公佈今年中期業績，又係核心業務改善的典型，佢中期純利12.9億美元，派中期股息每股11.5美仙，另派特別股息40美仙。

航運股可炒業績

航運業前景和經濟周期掛鈎得更緊密，未來風險除了油價外，還有下半年的貨運業需求，但美銀美林認為，雖然他們亦關注冬季航運業前景，以及憂慮零售業補倉周期已經完結，但現時東方海外市帳率約0.98倍，並是亞洲區內航運股最吸引的公司。中環茶友話，通常公司公佈完好業績炒高會回一回，東方海外上周五股價就回吐3%，等佢回吐得深啲，不妨吼吓，仲可以收埋4元高息。

最後唔能夠唔講吓和黃，佢係一間綜合企業，做電訊、碼頭和零售，以及地產，如果唔係受3G業務3集團過去表現唔好拖累，人人都識估佢嘅業務可以在經濟復甦時顯著回升，但市場最睇唔通係3G，但和黃今次公佈業績就俾大家一個驚喜，今年上半年純利升12%，令分析員大跌眼鏡。

和黃轉勢有預期

蝕咗9年的3集團，今年終於有望止血賺錢啦，估計全年3集團可以實現稅前正現金收益。李超人話，如果3G賺錢，和黃股息會增加。大行紛紛調高和黃目標價，大摩更調高至73元。和黃上周五收58.2元，大升9.7%，和黃一支大陽燭咁升上來，雖然短線有回吐風險，但60元是近年的頂位，若能升穿，確認突破向下之勢，和黃有機會展開一個升浪，和黃衰咗咁耐，終於有翻身機會啦。

上述一堆全部都係大股，由於經濟循環再上，佢哋又食到應，核心業務顯現強勁的「內生性增長」，下半年料有好業績，等回吐吸納，有一定的值博率也。

hightea@hkheadline.com 企業CEO陸羽仁‧逢周一至五見報