陸羽仁 - 內地鬆手撐大市？

港股連續第三日上漲。恒指朝早曾經上過20500點，但好快就碌番落嚟，其後升幅逐步收窄，收市升88點，報20467點，但現貨收市後，期指尾段頂番起，結果收報20525點，升126點，比現貨高水58點。大市成交額略回至543億元。

內銀股及內房股係支撐大市嘅主要力量。據報道，繼上海、南京及杭州等地的銀行放鬆第三套房貸後，深圳、北京部份銀行也已悄然放鬆第三套房貸款。對於三套房貸，只要首期唔少於50%即可放行。北京也有銀行向傳媒表示，第三套房按首期不低於50%、利率不低於基準利率1.1倍的政策放貸。

樓價唔升當達標

在近期調控之後，內地樓市無大跌，但係總算控住升唔起，據國家統計局昨日發佈的資料顯示，全國70個大中城市房屋銷售價格，5月份仍較上月上漲0.2%，但到6月份，已開始輕微下降0.1%，是09年3月份以來首次出現下降。房價6月份出現了輕微下降，但按年漲幅仍係兩位數。

中央壓抑樓價剛剛見到些微成效，銀行又開始偷偷放水，究意呢啲係個別銀行自己的行為，定係阿爺隻眼開隻眼閉鬆吓手？如果無阿爺首肯，呢啲銀行放水手法好快會叫停，唔叫就等如阿爺鬆番啲。中央昨日已經講明對樓市的調控措施短期內不會放寬，但呢啲只係官話，內地經濟放慢得比較急，溫總又講到明國際金融形勢曲折超預期，所以阿爺放少少似有若無的鬆手訊息，支持吓大市都唔奇。

內房股昨日同內銀股一齊爆上，其中龍頭股中海外(688)漲4.4%、富力(2777) 升3.2%、華潤置地(1109)升2.2%、碧桂園(2007)同雅居樂(3383)齊升1.6%。內銀股除民行(1988)外，其餘「六行」都造好。建行(939)升2.4%、工行(1398)升1.9%、中行(3988)、交行(3328)、招行(3968)及中信(998)都升逾1%。

升力未足還看外圍

港股近期升番啲，但以昨日計上升動力唔係好夠。中環茶友話，港股要升番上20800點，升番上250天線以上，才較安全，但後市就要睇美股嘅季度業績公布潮表現如何。

世界盃終於落幕。有證券界人士將今屆世界盃同投資做比較，又幾有趣。首先係世界盃同股市都會隨時爆冷，上屆冠軍亞軍意大利同法國爆大冷，第一圈就出局。好似當年世界排行第五嘅雷曼兄弟，話爆就爆，仲搞出個「金融海嘯」，球迷同投資者，齊齊輸身家。第二點係防守策略，贏到世界盃同投資賺到錢，防守最重要。冠軍西班牙入咗8球，唔算多但失球只有2球，係所有球隊最少嘅。所以好進取，入好多球，並唔係致勝嘅關鍵。最緊要仲係輸得少，呢個同投資一樣，你的股票隻隻有錢賺，但好衰唔衰走去學人買迷你債券，結局係一鋪清袋。據統計，西班牙係所有球隊中控球時間最長嘅。同投資一樣，能夠將你的注碼好好控制住，睇定啲至郁，先至有勝利的希望。最後，球證係唔可靠嘅，今屆世界盃執法球證就屢屢出錯，投資亦一樣，證監會金管局的「執法不當」或者監管出漏洞，都直接影響到市場運作同你嘅投資回報，小心小心。

企業CEO陸羽仁‧逢周一至五見報