陸羽仁 - 譜出人生路綫圖

加拿大網友、大學生Denlee話，屋企收入唔多，買唔起車，但見到同我差唔多大的後生仔開住部BMW，果種感覺真係覺得做人有乜意思。後生仔走到人生交叉點，唔止買唔買車，甚至係提早做嘢抑或繼續讀大學，或者打工抑或創業，都有好多疑問，多問多想，比不問不想好好多。

少爺仔E Q 點會贏

Denlee計出做兼職買車或退學打兩份工買車的不同金錢後果，計出退學賺錢多啲，我諗呢個唔係咁簡單計一條數的問題，而係人生路綫問題，假設法例容許細路仔6歲開始打工，你計畀我睇我個仔讀完幼稚園唔讀書，小學、中學、大學都唔讀，到22歲時，佢打咗16年工，賺的錢一定比讀書那個多一樣，條數不說自明，但我的問題是︰人生係一個長跑，咁跑下去到60歲時邊個賺得多啲，邊個賺得舒服啲？呢條數唔易計。

逐個問題講，首先講買車。千金難買少年窮，當你覺得無車揸好慘，我就睇到那些阿爸一早畀架BMW佢揸的後生仔好慘，佢哋一切都得來太易，仲邊度有動機去爭取？那個十幾歲就揸BMW的少爺仔(唔好介意我咁講，父母照顧得太好，令好多後生仔變成少爺小姐)，遇到困難，會講句「咁辛苦為乜？」就咁就撤退，這種性格EQ，又點會贏？

大學要學思考方法

我反對你退學。一般人好易犯上一個邏輯錯誤，會認為李嘉誠、蓋茲都無讀過大學，所以讀大學無用啦。大家要記住，呢啲係例外，唔係典型，即係大多數人唔讀大學的人長綫事業前景都會差啲，大多數人食煙健康會差啲，唔好攞住少數例外就當典型。而且按我自己的經驗，大學並非只為一張沙紙。在一所好大學讀書，搵的好老師，學佢哋嘅思考方法，可以幫你學到點解決問題，如果你無呢種感覺，你又係唔係無畀心機求學，如入寶山空手回呢？按自己的經驗，在大學學到好多求知識解決問題的方法，令自己有一種能力，以後唔一定要找老師，都可以靠自己為各種問題找到答案，終生受用不盡。UBC係一間好大學，但你21歲讀一年班，已經略遲，不要諗退學，要諗追番失去的光陰。

創業成功不容易

創業不容易。如果你唔係有一種人無你有技術，創業一啲都唔易，我有個朋友叫我同佢個仔傾吓，個仔讀完書唔想打工，覺得創業做老闆自由自在，覺得創業好易成功。我都係做咗好耐生意的人，同佢一傾，發覺佢個仔對做生意完全係門外漢，成日想做好嘢、做靚嘢，唔識計成本，唔知對手係乜水，唔知道若唔成功自己有的錢可以捱幾耐，最重要係無計唔做嘢去創業仲要蝕錢損失的機會成本有幾多。我同佢傾完，畀佢一個建議，叫佢在想從事的行業的成功機構中，打三年工，學吓人地成本的秘訣，先至諗自己去做啦。

唔好咁輕鬆話唔讀書、創業失敗可以做乜做乜。你搞一輪到30歲後，才去啲無學歷要求的行業，競爭力已比20歲入行的人差，可能做那些行業都無大成就。當年20年後見到當年UBC的同學，當上各行各業的高職，住靚樓揸靚車，佢買大屋，你仲做緊經紀仔去服侍佢時，個種味道唔易頂㗎！

www.hkheadline.com/blog/index.asp