陸羽仁 - 放唔放水兩難題

昨晚適逢美國國慶休市一天，港股昨日自由飛行，成交淡靜，在農業銀行(128 8)今日招股截飛前夕，港股有些支持，窄幅波動，唔知今日農行截飛兼定埋價之後，個市有無咁硬淨。

港股昨日走勢反覆，跟隨周邊低開96點後，曾兩次上試上日收市位，但都企唔穩，跌番落嚟。恒指收市報19842點，跌63點，大市交投淡靜，成交僅多過400億元。

美股標普 500指數出現「死亡交叉」，即50天移動平均線跌穿200天線，中線走勢看淡。一直係美股好友的對沖基金TraxisPartner創辦人碧斯話，佢上周二開始大幅減持佢手上一半美股，佢認為經濟數據非常令人失望，開始擔心會變成雙底衰退，並維持兩到三季，美國名義GDP增長只有2至3%，這樣對企業盈利有好大影響。

溫總話曲折超預期

環球經濟到十字路口，危險正在上升，好似碧斯咁審慎啲都無壞，去年佢在低位入市令佢個基金有38%回報，今年當然唔想博咁盡搞壞個招牌。

中國似乎都感到勢色唔對，溫總日前喺湖南考察完多家大企業後，主持召開湖北、湖南、廣東三省經濟形勢座談會時話，「國際金融危機影響的嚴重性和經濟復甦的曲折性都超過了人們的預期，宏觀調控面臨的『兩難』問題增多，我們不僅要大力解決那些長期存在的結構性問題，同時又要有針對性地解決當前存在的突出的緊逼性問題，這些都必須在經濟平穩較快發展的前提下進行。」溫總第一次講國際金融危機「曲折性超預期」，又講到要解決經濟兩難題要在「經濟平穩較快發展的前提下進行」，看來佢都留意到美國經濟再現雙底衰退的風險。問題係阿爺會唔會放番鬆調控的力度？我睇暫時未會，放唔放水係兩難題，太快放怕推番高樓市，所以阿爺要等內地和環球經濟再差啲，股市跌多啲，政策才會轉，但溫總的講法等如開始承認環球經濟有問題存在。

中資金融股係市場近日嘅焦點。農行招股今日完成，而孖展就喺昨天截止，個市在農行截飛兼定價後會唔會頂住，成為市場最關注的事情。而農行招股都未完，中行(3988)已經進行600億的集資活動，陸續有嚟嘅還有工行(1398)和建行(939)，最後加加埋埋在中港兩地隨時集資幾千億，真係抽水抽到大家荷包乾。

中行抽水減融資威脅

中行供股計劃，大行普遍睇得都幾樂觀。花旗指中行供股明顯減退融資威脅，中央有機會支持亦可增加信心，評級維持「買入」，目標價5.1元。瑞銀亦指，中行供股模式威脅較原先估計低，評級維持「買入」，目標價5.6元，即預期市帳率2倍。睇得較差係高盛，目標價只有4.5元，但維持「持有」。

中資金融股成為拖低大市嘅主要元兇。恒指金融分類指數下跌0.7%，跑輸大市。「四保七行」，除了平保(2318)繼續停牌，民行(1988)被花旗調高投資評級至「買入」，微升0.2%，其餘全線向下。國壽(2628)、建行、中行、交行(3328)及招行(3968)都跌約1%，中資金融股未來壓力唔細。