陸羽仁 - 病貓彈起嚇親人

環球股市跌咗一排，資金逃入國債避險，但呢個世界跌得多就會彈，昨日環球股市單日轉向，連匯市都郁埋，風險資產湧起一波反彈浪。

昨日恒指早段跟日股低開64點，中午過後澳洲央行開會後表示，維持利率4.5 厘不變，搞到澳元即刻彈起，在亞洲市急升1.8%，上番0.85美仙的水平，連帶歐羅都升0.6%。內地股市又升、澳元又升，市場一下子對風險資產回復番啲信心。外圍一個拗腰，港股下午亦跟住升，尾市重上20000點，臨收市再抽上至全日最高位收市，扭轉了連續四日跌勢。恒指升幅唔算好大，但勝在走勢靚仔。恒指收市報2008 4點，漲242點，但交投仍顯淡靜，大市成交只有465億元。

中環茶友話，外圍股市上周連跌多日，一定等機會醞釀反彈，今日唔彈遲啲都會彈，昨日單日轉向，好似一隻病貓突然跳起，都嚇你一跳，做咗短期淡倉者都會平倉避一避。佢認為呢隻仲係病貓，唔係壯貓，唔好期望佢回復健康四圍捉老鼠，起身好似無事咁巡一圈就算好啦。

農行借勢定高啲價

股市彈起當然有利農行(1288)定價，昨日工行(1398)、建行(939)、中行(3988 )都升。農行認購昨午截飛，隨即開始定價，截稿前初步消息稱農行公開發售部份超額認購逾14倍，國際配售部份超購12至13倍，承銷商傾向於在3.18至 3.38元水平定價。換言之，最終定價的預期市帳率(PB，即股價除以帳面值，PB值愈低愈吸引)，不會低於1.71倍。有部份基金經理表示，昨午後再收到通知，農行超標認購，定價下限一再提高至3.28元。

農行呢啲大型IPO，主要大行都參與承銷團，唔會唱衰。不過昨日有證券商出報告「潑冷水」，未有參與是次招股的台資券商「元大證券」指，農行的合理價為3.8元，在其他內銀股上市均能提供30%以上升幅的預期下，農行不應以高於2.9元買入；若果認為買農行H股要有15%回報的，就不應以高於3.3元買入。

有投資銀行界人士分析，農行的「加價」之舉有兩個作用，一是以下限上調，迫使在最後關頭落單的機構投資者提高落單價，因為佢地頂多落下限價，即係唔低得過3.28元；其二，是將上限調低，叫大家放心農行不會以原來的上限定價。

世房半年賣少咗樓

內地打擊樓市措施收到啲降溫效果，內地開發商銷售回落，上海復地(2337)公佈，今年6月的合約銷售額按年跌27.5%；6月合約銷售面積按年跌19.4%。另一內房股世房(813)由於開售新盤帶動，6月份單月銷售約為18億元，按月上升20%，但今年上半年累計合約銷售額達113億元人民幣，按年跌13.9%。

以世房計，雖然上半年平均售樓價升了22%，銷售金額仍跌了14%，呢條數才是實數。今年上半年簽約，應該明年交樓才入帳，就影響到明年盈利，未必好得過今年啦。往後還要睇往後樓價係頂得住，抑或好似內地官員估還會有一浪調整啦。不過內房股呢排彈得幾靚，以這兩隻股為例，世房昨日升3.2%，復地升3%，叫做收復番啲失地啦。