陸羽仁 - 整容公主腳頭好

美國個市十分搞鬼，早前三個星期內杜指跌咗1000點，跟住兩個星期又彈番80 0點，跌得誇張，反彈亦誇張，結果到周二已連升6日，收復大部份跌市失地。恒指跟隨外圍高開291點，但已經係全日最高位，之後逐步回軟，一級級咁落番，尾市略彈，恒指收20560點，升129點，成交550億。期指收20553點，升119點。

中環茶友話，佢唔係好鍾意昨日的市況，杜指上日升146點，但港股跟唔足，一開市見高位20772點就陰陰落，頗有借美股上衝俾番啲貨你之感，顯示短線唔係人人無限量睇好，或者咁講，美股升咗咁多，怕佢有啲回吐，好漢不吃眼前虧，都係走番啲貨先算，而散戶卻會因為覺得大市「升唔夠」而追貨。

茶友話，唔覺唔覺港股由農行(1288)招股前走勢一度超越美股，變番稍稍落後於美股，暗中交番少少功課出來，跟唔足美股呢一浪的升幅。

滙控又話有衝擊

茶友特別留意美國，話近日美國企業報出來的業績，唔似有雙底衰退，美股因而強力反彈，但仲有人信美國經濟未掂，其中一個就係滙控(005)大班葛霖，佢在倫敦話金融危機遠未結束，目前正逐步擺脫危機，對未來再次受到衝擊的可能性，市場不應掉以輕心咁話。茶友估計美國都係走緊一個上落市，直至經濟走出清晰的方向為止，中間大上大落搞到大家嘔白泡。

至於內地情況，早前中央多個部門前日齊齊闢謠，否認傳媒有關「房地產市場調控有關政策可能取消」的報道，房地產股即時腳軟，但全國人大常委會副委員長成思危又派粒定心丸俾大家，話房價下跌幅度不能超過25%，否則對邊個都冇好處。受成思危言論刺激，內房股及內銀股表現好番，恒指金融分類及地產分類領漲大市，齊漲近1%。

今天(周四)內地因素將左右大市，因為6月經濟數據將於今日公佈，而農行A股早過香港一日先在內地掛牌。阿爺命水好兼功力深厚，農行這個四公主今日正式出嫁，遇上環球股市企番定，佢都算腳頭好啦，今日都可以樣靚靚出來見人。內地證券業估計，農行A股首日可能比招股價2.68元人民幣有10%升幅，有機會見 2.95元(折合港幣3.39元)，若非外圍大變，應該唔會潛水，咁農行明天(周五)在港掛牌都會勝利登陸。

農行狂升不妨游水

中環茶友笑住話，呢個四公主唔係化妝，直情係整容，佢本來係四大國有銀行中帳目最唔靚的一家，但阿爺做手術將佢幾千億累積呆壞帳移走，仲幫佢整到佢今明兩年的盈利增長均可望在30%以上，明年的每股盈利據此推算即可上升至0.37元人民幣，每股派息可達0.17元人民幣(0.195港元)，以上市價計每股股息回報有6% ，這樣頂到行，咁就唔靚都覺得靚啦。散戶策略若本來是長線，唔升得太多可以長揸收吓息，升到20%以上不妨游吓水，高追就無謂啦。

另外，中國今日將公佈6月數據，內地經濟界普遍預期會下滑，工業增加值增速會減慢，通脹(CPI)也不致增加太多，如果一如意料都略放緩，對市場的影響有限。

企業CEO陸羽仁‧逢周一至五見報