陸羽仁 - 散戶返頭吼農行

美股上日連續第五日上升，美國鋁業打開美股業績公布期序幕，開出紅盤，有利美股後市氣氛。恒指反覆偏軟，結束連續三日升勢，但恒指都頂得吓，收市只是微跌36點，報20431點，恒指期貨收報20434點，跌91點，比現貨輕微高水3點。大市成交淡泊，只有473億元。

內房A股急跌

中港兩地股市近日反彈，主要由內房股及內銀股帶動。上證綜指早前就受到市場「第三套房不放貸政策可能將取消」，加上上海、深圳等地出現三套房貸放鬆等現象的傳言刺激，地產板塊發力暴上，大漲逾3%，連帶銀行股也隨之大漲。

不過傳言愈傳愈誇，終於引起住建部等多個部委發出緊急通告闢謠，否認傳媒有關「房地產市場調控有關政策可能取消」的報道，並表示中央堅定不移貫徹國務院在 4月17日發出的《關於堅決遏制部份城市房價過快上漲的通知》，即「國十條」的房地產調控措施。

由於各部委統一了口徑，內房股A股受消息影響，昨日跌個四腳朝天，拖累內地股市昨日下跌，上證綜指失守5日平均線，收報2,450點，下跌40點或 1.6%，上海、深圳兩市成交額共計1292億元人民幣，比上一個交易日縮小逾一成，跌市成交下跌，顯示內地股市沽壓未算太大。內房A股插得多，H股就硬淨啲，中海外(688)及華潤置業(1109)都有進帳，微升0.6%；富力(2777)就差啲，跌1.3%。

高人話，阿爺的調控措施的效果，其實會滯後，影響要到明年先至出來，內地市場暫時都唔係好缺水，而中國房地產去年市度暢旺，地產商賺到盤滿砵滿，好多又上埋市集埋資，唔使好似08年宏觀調控時劈價求售，所以樓價無乜下跌。阿爺想樓價跌啲，但係亦怕樓市太弱連帶經濟都受影響。最近人民銀行貨幣委員會講話傾向講適度貨幣供應，唔係再講太多宏觀調控，所以口氣的確係鬆動咗，但係又未到要全面放鬆調控樓市措施的地步。內地樓市股市跌得耐，又會傳吓放寬調控的新聞，又炒吓，然後政府澄清又插吓，直到政府真正出招為止。

個別新股有前景

康宏理財(1019)昨日首日掛牌，收市報1.52元，較招股價1.2元低26.67%，全日最高及最低1.57及1.32元，在近高位收市，成交金額 1.9億元。康宏理財公開發售超額認購91倍，認購熱烈，炒上都好正常。

經紀張話，農行早前招股，散戶無乜認購，但最近見個市唔跌，好多人有啲後悔，不斷問佢農行買唔買得過，似乎好多人想等星期五農行一上市，就入市補貨。

所以經紀張有個陰謀論，話大朋友在散戶唔認購農行時入大飛認咗唔少農行，而家外圍股市相對穩定，佢地在本周五農行掛牌前，頂住個市，到時農行開盤升番咁上下，散戶繼續魚貫入場補貨，大朋友即食執你10%都唔錯。我話散戶短炒反應太慢，好多時股份升咗好先入市，就會接火棒，農行係大股，若果開盤抽高，已經升咗咁上下，就唔好期望太高，康宏可以升26%，農行就唔係咁易升26%，特別係長線投資者，更加只能低吸，而唔係高追啦。

企業CEO陸羽仁‧逢周一至五見報