青心直說：君子愛財取之有道

李超人繼續叫大家樓與股皆宜「量力而為」，現實中究竟又有幾多人會真正識得睇餸食飯，近期身邊唔少朋友，已被甚麼天價大屋成交及甚麼屋苑一兩個月就賺幾十萬嘅報章財經版頭條所刺激，蜂擁入市嘅買家來自四方八面，有計過度過寧願炒樓好過做生意嘅老牌廠家，亦有未曾見過97年炒家點樣一鋪清袋嘅八十後，也有早咗落車又忍唔住上返車嘅用家。

百零萬嘅盤已幾近絕迹，除非去到屯門，200萬樓因為釐印費只係100蚊、炒賣成本低而最受歡迎，前幾日撞見住在樓下嘅鄰居，原來佢已經賣咗間樓，暫時租住先，西貢獨立屋三千幾呎有埋私家泳池租5萬零蚊，半山2000呎租金又係5萬蚊，有無樓一身輕一族索性豪番次，撥出售樓之部份利潤出嚟享受一下，反正買唔起咁大間屋，總之就係因為咁，市場租售俱旺。

過去幾十年港人買樓已習慣做按揭，記得超人話過佢第一間樓係一次過畀晒，不過今時今日有幾多個香港人可以買得咁豪呢？

半份人工供樓要三思

o 依家樓價跟薪金已完全脫節，一來地產商mark up得犀利，二來打工仔出糧後使費大，又要供保險、又要畀家用，慘過俾人分身家，三來住宅樓實用率實在越來越低，實質呎價實在唔平。買樓當然唔好借到八、九成，但係要儲夠五、六成先至入市買樓，又要計到足隨時加息或樓價向下加埋銀行call loan等等或然風險才入市，咁個樓市又點可以有咁活躍呢！

最近有好多細舖唔見咗，時代廣場加租，租戶食肆又再洗牌，當大家眼見酒樓開始摺埋，經濟有幾好真係呃唔到。君子愛財、取之有道，所指係合法之道與合情合理之道；然而君子亦不應立於危牆之下，假如你現時每個月供樓開支已接近入息一半，而在可見將來人工又未必會升得快過利息，咁就要三思三思。

胡孟青

獨立股評人