陸羽仁 - 莫再等金融海嘯

周末在老友們茶敘，一個老友問我，金融海嘯幾時再來？我見老友講到金融海嘯時，並無驚恐，反而露出一臉企盼的眼神，即時反應是有點奇怪，心諗呢個老友做生意，無理由望有金融海嘯，但回心一想，佢應該在海嘯時無入市買樓買股，覺得錯失機會，所以期望海嘯再來，俾個機會佢執平貨。呢個世界又會唔會咁理想呢？

記得著名基金經理彼得林治(PeterLynch)曾經講過，每到星期日睇報紙，總會出現「樓價即將大跌！」、「股災很快到來！」等標題林治認為，這些只是吸引人眼球的標題，樓災股災通常不會發生，如果你相信這些評論，就經常不能投資了。

無可否認，如這些嚇人標題所講的金融海嘯，的確在08年9月至今年3月發生了，雖然這是百年一遇的金融災難，但因為它的確發生了，更令人覺得金融海嘯好容易再發生，但事實又如何呢？

講番我如何回應老友有關金融海嘯的提問，我當時咁答：「首先，我要問你講緊短線定長線，若講長線，即係3、5、7年，我真係唔知，好多人都覺，如果美國在海嘯後無改革金融制度，繼續容許華爾街大發花紅，以貪焚指引他們作不負責任的投機，難保金融海嘯不會再來。但這些宏觀分析，對你1年之內短線投機、投資的決定，一幫助都無，短線而言，大市似反覆向上，投資市場向上的風險大過向下的風險，你想等海嘯再買的希望好可能會落空。」老友見我篤爆佢「想等海嘯再買」的心理，面色微紅，但繼續爭辯，為何短期內不可以出現股災樓災呢？問我係唔係「肯定」無咁樣機會？


金錢太多資產例升

我話我只能「肯定我不能肯定」，我話邊個講「肯定」你都唔好信佢，只講一個最簡單的變數，若果股市樓市升得太急，例如港股在年底前就急升上31900點的歷史高位，咁短時間升咁多，升得又急又快，好明顯出現泡沫，咁又好大機會爆破，升得愈快爆得愈快。如果你唔睇股市點升，咁快就肯定佢好快會爆或者唔會爆，又係唔係太武斷呢？

但唔講「肯定」，可以講「可能」，照目前的情況看，未來1年投資市場的趨勢很可能是向上而不是向下，進一步復甦的機會大過再現股災。我向老友解釋，現時投資市場的大趨勢，和全球政府的回應金融海嘯措施有關。上星期雷曼兄弟倒閉和金融海嘯一周年，事後回想，美國政府完全可以拯救雷曼，但佢最後選擇不救，觸發金融市場信心崩潰，令去年9月和今年3月環球股市兩度下插至低位，最後以美國為首的20大國決定大印銀紙全力入市救市，金融海嘯危機百年不遇，政府唯有用百年不遇的力度印銀紙救市，結果終於頂住跌勢，同時由於金錢氾濫，令金融市場急促反彈，出現金錢太多資產例升的現象。

金融海嘯帶來的大跌懲罰了急進的投機者，隨後的大升卻懲罰了穩健的投資者，沒有太多投資者可以捕捉到3月以來的大升，部份人全部空倉等下一浪海嘯，結果海嘯沒有來，他們也沒有買貨。無買無賺錢都唔係太傷，更有甚者，有華資大戶一直認為股市會大跌，在13000、14000點就沽了大量期指，天天說股市太高會大跌，但大跌始終沒有來，他就被個市咬住唔放。


反覆向上趨勢未改

如今金融市場的大趨勢是回復正常，美元的走勢，正好反映了這種「正常趨勢」，由於美國負債最深，印銀紙的速度太快，所以美元出現長線的弱勢，正如我在上周一所講，在金融海嘯最烈時，資金一度走入美國國債市場避險，令美元短線抽升，蒙蔽了人們的視線，但金融市場又回復平穩，美元回復正常，弱勢立現，出現美元跌，資產升的大趨勢。

大家都預美元要跌，大家都預通脹要來，所以就把錢投入股市或樓市這等實物資產市場，特別是流去高增長地區的市場，想享受匯價和資產價格的雙重升值，中國這種市場最合老外的合味，所以中國股市升得最厲害，升得太急如今還在調整中(見表1)。港股和美股由於無內地股市升得那麼厲害，無需要急促調整，如今還在一個完美的上升走勢中(見表2，表3)，還在創一年高位，出現有調整、無大跌的走勢，趨勢是炒股者的老友，買股順勢去做，贏錢機會大。

港股升到21600點左右，接近1年前的水平，PE近15倍，若無再海嘯的風險，話高唔高，話低唔低，唔好估佢即刻會爆。如今升咁多，隨時可以出現調整，但跌番1000零點，調整7、8%，可能又差不多，抖氣又可以再炒，反覆向上的趨勢未改。若手上股票不多，應該趁調整時入市，而唔係一見升就沽貨。

未來影響後市最大的因素，是各地政府如何退場，撤回各種救市措施，若他們退得太早，經濟衰退的局面未扭轉，可能政府一退場經濟就插；但如果退得太慢，就可能因為錢太多出現惡性通脹，令股市樓市先急抽後急插。各地政府退場的時機選擇得好唔好，絕對會影響後市的走勢，唔係而家就完全預計得到。

金融界高人估計，中國會盡量爭取在主要國家中最早退場，以求證明中國經濟狀況最為強健，宣佈退場時難免引起一些短期震盪。另外，美國好難太早退場，因為好像伯南克那樣的央行行長，不想太早退場而要負上搞死經濟的責任，所以要拖到有通脹苖頭明顯出現時，才會慢慢退場。

若各地政府合埋地退場，金融市場經過震盪後仍會反幅向上，維持一個健康的反覆向上形態，而不是直線上升形態，股市、樓市可以炒耐。若政府退場太慢，惡性通脹突然湧至，股市第一個反應可能會急促抽升，因為唔投資好難對抗通脹，但股市出現泡沫後，政府不得不大幅加息以對抗惡性通脹時，就會把泡沫刺破。


超貴豪宅長咪制

老友見我話短期內唔似有機會再出現海嘯等佢執平貨，又倒轉頭問我追番去買樓買股得唔得，我話股市近期升得急雖然怕佢調整，但以長少少來計，買入都唔會太差，因為股市14、15倍平均PE唔算太貴，但樓市就惡講，特別係豪宅，而家發展商新盤開價無晒譜，好似一個九龍站所謂頂層特色戶，話要7萬幾元一呎，買入如要長，放租出去收月租15萬，都只係得1厘租金收益，長線唔知點支持呢價位。但短線而言，唔排除有人買，買家可能放低少少本錢博短炒，想博執5%、10% 就閃，呢叫做仆傻瓜遊戲，大傻搵二傻，無人夠膽講大傻一定唔得，但買咁貴天價樓長真係好難贏啦！

綜合而言，我對老友的建議是莫再等金融海嘯出現大跌，若手上持貨不多，等到小跌都可以買股票傍身，對抗一下通脹。當然買股又好，買樓又好，不能不看投資市場長、中、短期大勢，若中短期大勢向上，買貨贏錢的機會大過沽貨，不過話得說回來，股票受公司盈利和派息能力支持，物業受租金回報支持，若是中長線投資，PE太離譜的股票(例如幾百倍PE的殯儀股)和租金回報太低的物業(例如7萬幾元一呎、租金回報只有1厘的豪宅)，短炒好難講，長就真係咪制啦，所以話買話買，都唔可以闔埋眼就去買。