陸羽仁 - 「瘋股」倍升何時沽？

早前網友牆頭草問起關於「瘋股」的問題，值得一談。

網友牆頭草問︰「可否講講怎樣可以捕捉趨勢股(trendingstock)，我叫哪些為「瘋股」，如比亞迪(1211)、阿里巴巴(1688)，以及騰訊(700)等可以連升數月，倍升再倍升(doubleanddouble)，但捉到後的策略又如何呢？」

首先我地要分開兩種「瘋股」，一種是本地的莊家股，另一種則是有相對實質業務支持的股票。

炒莊家股要 識「落車」

本地莊家股的股價完全由莊家操控，左手交右手，搭住棚咁上，莊家唔係開善堂，梗係要賺錢，所以炒高股價目唔係派錢畀股民，而係引人落疊，最後在高位慢慢派貨，莊家賺夠錢走人。

當然亦有莊家股最後變身實業股，我最近聽聞有隻莊家股的大老闆想從良，認認真真搞業務，二老闆雖然想炒高派貨走人，但大老闆不同意，佢都無符，雖然呢隻的大老闆想認真做事，但從股民的角度看，就相當悶，因為無炒高，就好似唔郁咁，呢叫做「股票唔毒，股民唔愛」。如果你買的瘋股是本地莊家股，咁就祝你好運，住股票升到幾高都無用，能夠落車個才是成功的，呢先叫做「鱷口偷金」。

有實業支持唔怕

另一類瘋股係有實質業務支持的股票，網友牆頭草問的比亞迪、阿里巴巴、騰訊，全屬此類。比亞迪的電動車、阿里巴巴的網上商貿平台，以及騰訊的QQ，全部都唔係細生意。這幾家公司都係鬼佬基金愛股，近期公布中期業績優於預期，股價再度湧上。

其中騰訊8月中公布截至今年6月底止中期業績，純利22.28億元人民幣，與去年同期比較，上升89%，較市場一般預期的約75%為佳。業績公布後，瑞銀就發表報告話，騰訊中期業績理想，估計全年市盈率會拉低，若盈利增長持續強勁，估值更有可能提升，因為其QQ用戶基礎有明顯價值，騰訊亦證明其經營策略可以克服困難，將其評級由「中性」升至「買入」，目標價由80元上調至145元。

業績轉差始沽出

以騰訊為例，若全年可以維持上半年的89%盈利增長率，好粗略咁估純利可達52億，09年市盈率可以由76倍拉低到40倍。鬼佬是以高增長股的角度買這些股票，住唔放，直至到業績唔對辦，不再高增長才沽。