青心直說：冠捷兩大煞食概念

互聯網下載速度加快，令好多以前冇諗過的行業變成新的藍海，最近 YouTube計劃進軍網上電影租賃市場，同亞馬遜和 Netflix火併。美國人出晒名鍾意晚晚對住電視機發呆，家網上睇碟連出街都慳番，大受市場歡迎。相比起美國，內地網上電影下載一早已如雨後春筍，要乜有乜，最重要當然係公然嘅免費侵權下載。以前下載後想用電視睇都幾煩，要用唔同軟件轉換檔案格式，再燒做 DVD；後來市場出現 MP4播放器直插電視，最新的高清電視索性內置 WiFi，單靠遙控器已可睇乜有乜。有咁好諗頭嘅係冠捷科技（ 903），出咗一系列 WiFi電視，仲配備埋訊雷下載，果然成功打出一片藍海。喺上半年電腦顯示屏銷售疲弱的環境下，冠捷拓展 LCD電視業務逆市增長 4%，繼續保持全球五大 LCD電視生產商之列，市場佔有率升至 6%。至於老本行電腦顯示屏，生意的確麻麻。由於經濟疲弱，上半年全球整體顯示屏總銷量跌咗 56%，冠捷雖貴為全球一哥，呢方面收入都要跌 45%，當中以內地銷售跌幅最輕微，不過，第二季開始有明顯改善。

LCD電視增長潛力大
高盛早前發表報告讚好，估計旺季會持續至第三季，今、明年 LCD付運量會升 53%及 54%，目標睇 5元。的確，即使經濟衰退，去年全球 LCD電視需求仍增長 24%至 1.05億萬台，當中以用喺房間、部屋、廚房、廁所的小型電視為主，消費者對價格十分敏感，製造商為求減輕成本將陸續增加外判比例，業界預期今年全年全球外判比例達 30%。除咗接外判定單，冠捷在電腦屏幕的一哥地位吸引長城科技（ 074），早前透過佔股 47.82%的長城計算機，向控股公司長城集團收購長城（香港）差不多全部股權，最終使長城計算機增持冠捷股權至 26.5%，成第二大股東。睇中冠捷技術之外，仲有佢旗下飛利浦電腦屏幕商標的使用權，估計長城最終目的係食埋冠捷，增大電腦業務以外的市場份額。不過，飛利浦持有冠捷 12.7%股權，另有折合普通股約 3.42億股的可轉換債券，長城計算機要打響如意算盤，有可能向飛利浦埋手，甚至主動喺市場進一步增持。有盈利基礎又有併購概念，但短期升幅已巨，候低吸納可期。胡孟青