曹仁超 - 投資者筆記 - 9月同10月都不利股市

9月6日，周日。5月、9月及10月都係不利股市月，去年跌市由5月開始，令今年5月唔少人心慌慌，依家已證明冇事也。至於9月同10月又點？造成9月跌市原因係美國會計年度為9月結，因此唔少人9月份出售蝕本貨去減輕稅務負擔；10月份係開始向前望月份，如前景不妙，10月一樣係跌市，此乃9月同10月都係不利股市月理由。當然，2009年9月同10月又點？冇人可事先知道，但必須小心，擔心金價上升將令美元提早加息。


金價挑戰1033美元

　　暑假過去，新學年又開始。夏日戀情過去，投資者又要面對現實。2009年港股再次面對「春生、夏長、秋收、冬藏」自然規律。2008年係信貸收縮期，2009年上半年係信貸放寬期，8月份開始中國政府又再次推出略緊貨幣政策，估計一直維持到明春。8月份美股中金融股升幅十分大，例如Freddie Mac升216%、AIG升187%、Fannie Mae升177%。當豬都會飛時候，代表投機者已瘋狂，應可診斷反彈市已死亡，小心熊市第二隻腳9月又緊；反之，踏入9月金價又開始上升，相信8月份各位早已趁低吸納唔少金條。金價910美元左右係吸納水平，一旦升穿976美元，便上望1033美元，依家正挑戰呢個阻力位（銀價上周升幅更大）。柏克萊資本認為，如金價升穿1033美元，可見1106美元。SPDR黃金9月3日前增持十四點六五公噸實金，至一千零七十八點○一公噸。

　　2009年至今，美國又有八十四間銀行宣布破產，家仍有四百一十六間銀行列入FDIC觀察名單。John Kanas認為，美國有問題銀行超過一千間；《華爾街日報》則擔心美國商業樓宇貸款（涉及7000億美元）開始出問題。

　　1968年12月道指985點，1982年12月道指見1000點，整整十四年道指都係上落市；同期樓價由3萬美元一間上升到30萬美元。1999年8月底道指11365點，今天道指9310點，冇人可以肯定道指2009年3月6950點係咪今次熊市底，就算真係，相信仍有排搞（例如1966至82年熊市底1974年11月，但牛市到1982年8月才開始）。邊個話「長線投資實賺」?!

　　1968到82年美國處滯脹期，股價呆滯，樓價狂升。1999到2008年油價由15美元一桶一度上升到超過140美元，依家仲70美元左右，未來五年又點？股市呆滯，原材料價格會否由1999年起反覆上升？

　　美國由1982年8月開始信貸擴張期到2007年10月結束；美國負債比率由1982年相等於GDP 120％，到2007年相等於GDP 370％。2009年3月政府推出量化寬鬆政策，到2009年度7月止政府財赤已達1.27萬億美元（估計到10月結時可達1.8萬億美元）。情況有如汽車沙漠上因水缸過熱而死火，由於搵唔到清水，因此連鹽水亦倒入缸內。初期汽車仍行得郁，不過下一次跪低時，呢架車可能要報銷矣。為刺激經濟復蘇，2008年起美國經濟已由市場主導改為政府主導，情況同1930年代相似。呢次股市上升唔係因為基本因素開始改善（企業純利仍跌），而係因為流動性泛濫。透過TARP計劃，美國政府向金融機構注入7000多億美元，加上國會向會計師公會施壓，要求更改會計準則（重返2007年10月前制度）。奧巴馬所謂「改變」，原來只係改變美國銀行業會計準則！重返舊會計準則後，花旗、美國銀行、富國銀行等紛紛宣布今年上半年恢復獲利，高盛證券更大派花紅。至於實際經濟又係點？聯儲局剛宣布7月份美國公司工業產能使用率由6月份68.1％上升到7月份68.5％，就係咁多。據彭博報道，美國超過一百五十間上市銀行加起來有毒資產佔總資產5％，而股東資金只佔3.7％。換言之，未來只有求神拜佛希望呢D有毒資產平安大吉唔好出事，不然美國便繼續有大量銀行因資不抵債而被政府接管。


中國經濟外冷內熱

　　過去三十年，中國GDP一直保持高速增長，主要依靠出口和投資拉動。今年4萬億刺激方案帶動下，全年GDP增長率8％應冇問題，但2010年起又如何？今年投資增長和放貸增長咁快，係唔可能持續到明年，如單靠國內消費市場，持續地保持GDP 8％增長可能性唔大。

　　中國經濟未來，應該由依家低附加值高貿易依存度，轉為高附加值低貿易依存度。即未來貿易走向高品質化，而非2009年咁樣因為出口減少，便透過國企投資及放貸增長去拉動，結果出現「外冷內熱」情況。2008年中國出口佔中國GDP 40%，2009年透過4萬億刺激方案造成「內熱」，貸款增長率較2002－03年更強勁【圖】。2003年美國經濟復蘇後，中國立即收緊貸款，以免內地通脹率惡化。《財經》雜誌報道，今年8月份中國貸款增長率較7月份減少79%，由2480億美元降至520億美元。今年年初至7月A股升幅超過80％，但上半年企業純利卻回落30％。呢次由外需拉動轉為內需推動，係咪無風無浪（7月份入口減少31.9％，出口減少36.8％）？

　　內地自從股改後，A股出現一個怪現象，就係除非唔漲，一漲便漲過頭；除非唔跌，一跌又係跌過頭。例如2007年10月16日上證指數見6127點，2008年10月28日見1664點，09年8月4日又見3478點。上述情況除反映投資者唔成熟，亦因為整個市場缺乏拋空機制，導致一漲便人人睇好，一跌便人人睇淡。但願內地股市盡快引入指數期貨及個別股份拋空期權，去減少日後股市狂升暴跌情況（1973－74年港股亦因缺乏拋空機制而令股市狂升暴跌）。

　　1965年提出有效市場假設，經過呢幾十年實踐已證明係錯（全球冇一個股市唔出現瘋狂投機行為），取而代之係1976年由西蒙提出理性預期，上述仍假設投資者係理性。不過，1987年股災、2000年科網股泡沫爆破，皆證明投資者係非理性。1994年有經濟學家挑戰理性預期理論，並1999年提出「行為組合論」，即利用心理學研究成果作為基礎，去推算投資者行為。佢地認為股市係一場「非理性、自我驅動、自我膨脹泡沫」，可利用一連串分析技巧，例如：一、羊群效應；二、反應過度及反應不足；三、動量交易；四、逆向思維；五、研究大行及大戶增持或減持股票，然後對付之而獲利。其中較出色有「趨勢論」。

　　請記住，小心唔係細膽，魯莽唔係勇敢。


撲滅小火反形成大火災

　　2002年貝南奇曾揚言坐直升機擲銀紙去阻止通縮出現，令美國投資者對通縮憂慮消除，引發2003到07年股市牛市，呢一次卻唔掂。雖然美股由2009年3月至8月已回升50％，但CPI繼續回落。點解？1992年諾獎得主Gary Becker認為，1987到2007年格蛇做法係撲滅森林內小火，反而引發呢次森林大火。過去森林發生小火，作用係將枯枝殘葉燒掉，如每一次都被撲熄，反而形成枯枝殘葉大量積存，最後火災一發不可收拾。

　　貝南奇認為，美國三十年代出現大蕭條理由係當年政府干預不力，因此過去十八個月聯儲局資產負債表上升一倍，目的係阻止美國出現第二次大蕭條。十分奇怪係，貨幣咁大幅度上升環境下，2009年7月份美國CPI仍係負數。佛利民早已指出，大政府只會帶來經濟衰退。睇貝南奇干預可能成功阻止三十年代美式大蕭條出現，不過取而代之係九十年代日式衰退。

　　1982年開始美國進入「消費可令人富貴」時代，包括借錢買樓、借錢炒股票、借錢消費……令GDP每年平均上升2.2％……。總之，愈花得起錢愈富貴。1982年每增加2美元信貸可令GDP增加1元，但到2007年每增加6美元信貸才增加GDP 1元。2009年已增7000億美元信貸，但GDP到第二季仍係負增長！睇「愈消費、愈富貴」時代2007年真係結束矣，鐘擺開始向另一方向擺動。