一周兩件：中國稀土有鑊氣

中國稀土（ 769）對上星期五成交高達 9100萬股，開始有鑊氣，買入等創 1年新高。稀土連埋 7月尾配股效應計，最新 NAV 1.69元，現價 PB唔夠 1倍。呢期所見，內地同類 A股好似包鋼稀土（滬： 600111）已經率先大市創高位，最新 PB講緊 12倍。至於另一家同類股中科三環（深： 000970）， PB係咁意都講緊 2.8倍。博中港熱錢炒落後，中國稀土抵搞。中國稀土近年主力拓展項目之一，係用嚟生產節能燈嘅螢光材料。歐盟國家啱啱喺 9月 1號（對上星期二）啟動全面停止生產白熾燈，環球環保意識抬頭，好多國家亦陸續加入，稀土食正環保大氣候，單係螢光材料呢一瓣，已經係增長亮點，估計集團最遲到 2010年度，純利可以 keep番上近 3億銀水位， PE都係得 8倍單位數。呢轉博中國稀土突破 6月高位 1.83元，係咁意以 PE 12倍做目標，價見 2.28元，現價 1.63元潛在回報率挨近 40%， PB仲係得 1.3倍咁大把。

景褔可小注冷吼
景褔集團（ 280）最新 NAV 1.83元，現價 0.85元折讓 53.5%，有唔錯 NAV墊底。又集團仲揸住港交所（ 388） 131.4萬股，由景褔今年 3月底年結日到家陣，港交所每股升咗 93.5%，每股增 68.5元。單係港交所股價進賬，已經額外為景褔增值 9000萬銀，或每股 0.2元。而景褔揸住港交所權益，最新等值 1.86億銀，潛在變現金額都好肥仔。呢轉冷吼小注，一樣博景褔上破 1年高位 0.95元，以重估後 PB 0.5倍做目標，景褔價見 1.02元，回報率 20%。錢雋