青心直說：谷 GDP毋忘民生

金融海嘯一周年，美國總統奧巴馬發表講話，警告華爾街要收斂不負責行為，避免金融危機重演。另一邊廂，中美就輪胎關稅問題，將貿易保護主義矛盾升級，點知美國商務部玩大咗，奧巴馬俾中方拋一拋即時腳軟，承諾唔會爆發貿易戰。魯賓尼話中國唔能夠救世界，其實只啱得一部份，因為全球經濟已發展成牽一髮動全身的骨牌格局，唇亡齒寒的道理奧巴馬點會唔知。事件反映當公認最壞時刻過去後，在退出救市的敏感時期，各國為了自身利益，不論在貿易、政治及滙率等問題將爭拗不休。最新例子係美金跌到散晒之際，日本準財務相即出口術，話唔希望見到滙市突然大幅波動，並指日圓升值會打擊出口。還有澳洲邦，諜影疑案未解決， 2010年鐵礦石談判，大礦商力拓率先大鼻話唔傾，聯同當地業界玩減產，加上大行合唱話明年鐵礦石最少升 10%，簡直係明屈。中國每年鐵礦石進口需求超過 4億噸，業界近年積極走出去買礦買油田等資產，但因時機及保護主義問題，總是碰得一鼻字灰。

救市應改善經濟結構
要喺通脹重臨進入加息周期前做好準備，增加競爭力及談判籌碼，人才輩出的花旗國始終佔上風，已悄悄塗上迷彩，再次將金融業私有化。先係各大銀行將救市資金回水畀返聯儲局後，聯儲局就冇再放水，以無形之手成功將千億計資金回籠。至於美國財政部持有的 34%花旗集團，最快下月面臨「大小非」失禁。目前幾個減持方案，要喺 6至 8個月分批減或一次過減，咁長嘅解禁期就有如食慢性瀉藥，日日拉肚子。最離譜係有報道指，財政部為求將優先股轉換成普通股減持，計劃先發行 50億美元新股籌錢贖回優先股，又係搵股東笨，皆因將整個花旗集團嘅系統風險轉嫁畀投資者後，美國政府喺減持行動中，竟然可賬面獲利近百億美元。退要退得型，靜靜雞縮骨有失大國風範。正如諾貝爾經濟學獎得主史提格里茲話齋，目前銀行業問題由於有政府助紂為虐，變得更加嚴重，解決方法係唔好再盲目奢想谷 GDP救經濟，反而要改善經濟結構、公司盈利能力及國民生活水平，公司有錢賺，工人有人工加，先係社會持續發展之道。中國今年保八達標後，係時候諗吓當前以基建推動 GDP嘅盛世，對改善民生到底起到幾大作用。胡孟青