陸羽仁 - 新股客：呢趟「中」

受部署退市消息影響，美股尾市由升變跌，內地股市偏軟。中國中冶(1 618)首日掛牌失守招股價，恒指低開210點後跌勢持續，一度失守21000點，午飯時候滬綜指數止跌回升，滬綜指重上2800點上方。恒指下午開市反彈，但至21200點下方已無力再上，再度掉頭回落，恒指收報21050點，大跌544點，期指收報20965 點，跌605點，比現貨低水86點，成交89252張。國企指數表明更弱，收報12047點，勁挫384點。大市交投活躍，成交增多至787億元。

內地金融股仍然疲弱，「三保六行」全線下跌，跌幅仲勁過本地同業。國壽(2 628)及平保(2318)跌逾3%、建行(939)、工行(1398)及信行(998)跌近3%；中行(398 8)及交行(3328)更跌近4%。


巨股破發震撼人心

大市本周雖然升上高位，但成交一日少過一日，動力似乎正在減弱，個局擺明係表面平靜、內裏動盪，結果一鋪跌落，差不多掃清之前幾日升幅，?家發達國家紛紛出口術，話準備部署退市，警告炒家平價資金供應將會減少，令投機熱錢稍為收斂，但炒家個膽大過沙煲，短暫的降溫代表轉勢，抑或好快又會捲土重來，要睇中央是否真正有收緊銀根的決心。

昨日跌市中的大件事係中冶上市跌穿招股價，而且唔係插一插咁簡單，而係全日係收低，咁巨型股價「破底」，當然好震撼，令到大市氣氛明顯轉壞，原本烚烚的新股熱潮，即時好似被冷水照頭淋。中冶開市報5.52元，之後橫行格局，收市報5.61元，較招股定價6.35元，跌11%，成交12億股，涉資69億元。未計手續費，每手損手740元，小投資者可以話係乘興而來、敗興而返。

恒地(012)主席李四叔昨日再露面評彈新股，呼籲投資者抽新股須注意不要相信名人效應，因為好多都係「畀面派對」，要看股票基本質素；而且不要人云亦云，每隻都去認購，並指由於上市公司價值過高，令投資者賺價水位不多，「較難搵食」，佢又形容目前大部份上市新股為「豬頭骨」，因無肉食，目前佢投資中冶虧損200萬至300萬元。

點解中冶會破底，最直接解釋係內地A股近日氣氛好差，今次中冶係先A後H招股，受制內地股市反覆，首日在內地掛牌升幅不足30%，以內地標準計屬於低於預期，已經係不祥之兆，加上掛牌後連日偏軟，故此本地掛牌前，暗盤已告急，終於出現爭相跳車導致破發的局面。

一向主張打穩陣牌的中環茶友冷眼旁觀今次破底事件，認為投資者中晒招，係冰封三尺，非一日之寒，皆因最近新股爭相上市，無人維持秩序之餘，配售亦出現博大霧情況，以往熱門新股爆飛爆得緊要，就會係國際配售大量回撥，但最近幾隻熱門股份，回撥都側側膊縮番條槓，結果有辦法之人擰住大量貨源，根本食都食唔晒，於是就掛牌前先場外執少少就掟貨，結果新股掛牌升幅不斷縮小，呢班有內線的炒家睇到形勢，自然打醒精神，當見到勢色唔對，就一個唔該走人先，亦種下穿底的禍根。


益內線炒家種禍根

茶友牙擦擦咁話，自己呢輪認新股，都只係真金白銀玩多少，就係因為見到息口平，資金充斥下，無論好股劣股定價都偏高，咁樣只係玩大投資銀行同招股公司個膽。從招股公司角度，既然有人肯買，點解個價唔盡先，當定價愈排愈高，風險不斷累積增加，呢種係平靜中潛伏的危機，好彩係新股大熱，大家中籤有限，就算損手都唔會好傷，不過，對放係銀行無息，抽新股博餐茶的老散而言，篤損手指就已經好無癮！

面對中冶穿底，茶友講笑咁話，自己的應對方法唔係處變不驚，而係處驚不變，雖然炒新股熱潮驟冷，但冷流中亦見有點溫暖，就係隻國藥(1099)首日升幅雖然無想像咁好，但昨日消化一輪後，股價抽番高，國藥概念比較獨特，但招股價偏貴，且看消化一輪後，會否有表現。同樣，中冶雖然破底，但呢隻係今年少數的巨股，過去巨股好少長期沉底，未來幾日能否穩定下來好值得留意，如果經過首輪斬倉，股價可以有支持，證明係有強者接貨，股價仲可以發圍，但如果不斷沉落去，咁就真正係咁先。

新股氣氛轉差，雖然永利(1128)未上市，但影子濠賭股已顯著回吐，澳博(880 )、新濠(200)跌5%，銀娛(027)跌7%，其他好多半新股好似中全通(633)、現代傳播(072)、承達(2288)，全部無運行，創出掛牌後新低。